Vigáriu Episkopál Re-evanjelizasaun ba asuntu Pastorál Dioseze Dili, Padre Juvito do Rego. Imajen/Cipriano Colo

DILI, 04 jullu 2019 (TATOLI)– Vigáriu  Episkopál Re-evanjelizasaun ba asuntu Pastorál Dioseze Dili, Padre Juvito do Rego,  hato’o obrigadu no fó Adeus ba Komandante FALINTIL, Saudozu Jaime Ribeiro “Samba Sembilan”  ne’ebé husik ona mundu ne’e iha domingu kalan (30/07/2019).

Segundu Komandante FALINTIL Rejiaun III,
Jaime Ribeiro ‘SAMBA SEMBILAN’ (9). Imajen/Eugénio Pereira

‘‘Durante tempu rezisténsia, ha’u la hasoru malu ho Samba, maibé ha’u rona nia naran, ha’u apresia tanba Samba ema ne’ebé brani, moris ho prinsípiu, no fó nia vida tomak ba rai ida ne’e,” hateten Amu Juvito, ohin, iha Pasu Episkopál Lesidere, Dili.

Padre Juvito espresa ninia tristeza tanba sinte lakon figura gerrilleiru ida fizikamente, maibé espiritualmente na’i lulik ne’e sei reza atu Samba nia klamar bele hetan salvasaun no hetan fatin di’ak iha reinu Lalehan.

Bibi atan ne’e hato’o obrigadu no husu timoroan hotu atu hato’o obrigadu, tanba Samba merese duni atu ema hotu hahí kontribuisaun boot ba rai ida ne’e.

‘‘Deskansa em pás !  Maromak bolu ona nia sai husi mundu ida ne’ebé terus, nia sei la hetan tan terus ona,’’ tenik Amu Juvito.

Padre ne’e haktuir liu tan, timor oan hotu ida-idak ho nia kontribuisaun  ba rai ida ne’e no Samba iha ninia kontribuisaun boot ba rai ida ne’e.

Liu tan ida ne’e, Samba hamutuk ho gerrilleiru FALINTIL sira seluk iha mehi boot liu atu liberta povu ida ne’e ba moris di’ak, tanba ne’e husu ba sira ne’ebé sei moris atu kontinua luta ba mehi ida ne’e.

‘‘Nu’udar amu lulik, ha’u labele halo buat ida ba nia, maibé ha’u sei reza no reza ba nia atu bele hetan rahun di’ak, deskansa em Pas, Amen!’’, Amu  Juvito harohan.

Jornalista  : Cispriano Colo

Editór        : Francisco Simões 

HAKEREK NO HATÁN

Please enter your comment!
Please enter your name here