Sentru Saúde Vera Cruz, Caicoli, Dili. Imajen Tatoli/Felicidade Ximenes

DILI, 4 jullu 2019 (TATOLI)—Númeru moras ne’ebé rejistadu aas iha Sentru Saúde Vera Cruz durante fulan juñu mak moras asma, moras kulit, diareia, pneumonia, dysentri, scabies, moras matan inklui mós vítima asidente tráfiku no asidente seluk.

Xefe Sentru Saúde Vera Cruz, Dulce Pinto Tilman informa katak moras ne’ebé rejista iha fulan juñu mak dahuluk moras asma (infesaun vias respiratória/ispa) hamutuk 2.328, moras kulit 488, diareia 296, pneumonia 72, dysentri 10, scabies 60, moras matan 62 no mós vítima asidente tráfiku 44.

Xefe Sentru Saúde Vera Cruz, Dulce Pinto Tilman

Nia esplika, fasilidade sira iha Sentru Vera Cruz liliu ba ekipamentu sufisiente tebes atu bele utiliza halo atendimentu ba pasiente. Aleinde ne’e, estoke (stok) aimoruk mós sufisiente atu halo atendimentu ba komunidade ne’ebé mak mai halo tratamentu saúde iha sentru refere.

Dulce hateten, bainhira aimoruk laiha, sira hato’o pedidu ba Serbisu Autonómu ba Medikamentu no Ekipamentu Saúde (SAMES) no SAMES distribui aimoruk tuir pedidu ne’ebé sira hato’o.

“Ami iha atendimentu ba komunidade sira iha Vera Cruz dadeer to’o lorokraik, iha ne’ebé kada loron simu pasiente sira hosi ema na’in 200 to’o 300,” nia tenik ba Agência Tatoli iha nia kna’ar fatin, Sentru Saúde Vera Cruz, Caicoli, Dili, ohin.

Nia salienta katak, kona-ba transporte hanesan ambulánsia, sira iha ida maibé multifunsaun tebes no kondisaun ambulánsia ne’e laduun di’ak, tan ne’e dalaruma hetan suporta hosi ambulánsia nasionál.

“Pasiente sira ne’ebé mak kondisaun grave atu halo transferénsia ba Hospital Nacional Guido Valadares (HNGV), ami tenki husu tulun ba iha ambulánsia nasionál mai tula pasiente sira ba halo tratamentu saúde iha ospitál nasionál,” Dulce haktuir.

Xefe Sentru Saúde ne’e esklarese, kareta ambulánsia multifunsaun ne’ e fasilita atividade iha suku sira liliu transfere sira ne’ebé moras lori ba ospitál nasionál, maibé ambulánsia refere nia ekipamentu iha laran ne’e laduun kompletu hanesan ambulánsia ospitál nasionál.

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here