Ministru Obras Públikas Salvador Soares dos Reis Pires, Imajen/Egas Cristovão

DILI, 04 jullu 2019 (TATOLI)—Ministériu Obra Públika (MOP) liuhosi Diresaun Nasionál Planeamentu Urbanu no abitasaun (DNPUA) finaliza ona estudu pre-viabilidade ba planu revitalizasaun no abitasaun urbana.

Oitavu Governu Konstitusionál iha planu atu estabelese unidade uma hamutuk 2.000 to’o 4.000 atu revitalisa bairru hodi regula futuru abitasaun komunitáriu iha kapitál Dili.

Ministru Obra Públiku (MOP), Salvador Eugénio Soares dos Reis Pires, informa iha estudu pre- viabilidade ne’e  halo ba konseitu no forma  uma  inklui tipu uma.

“Ita mós sei halo estudu viabilidade no estudu kona-ba impaktu sósiu-ekonómiku área alvu liu-ba komunidade ne’ebé hela iha bairru atu muda ba abitasaun foun,” dehan Ministru Salvádór ba Agência Tatoli iha edifísiu Ministériu Finansa, Aitarak-Laran, Dili, ohin.

Governante ne’e tenik, iha estudu viabilidade ne’e mós sei haree  kapasidade finanseira atu abitasaun ne’ebé halo ne’e bele responde ba alvu demográfiku ho kondisaun sósiu-ekonómiku, kulturál ba sosiedade ne’ebé atu kobre ba abitasaun foun ne’e.

Nia akresenta, MOP serbisu hamutuk ho Ministériu Justisa atu fó rai iha  Becora no Comoro ho ektare 6.4  no Hera  ho ektare 25 resin ho alvu mak halo uma 2000 to’o 4000. Ba bairru foun ne’e, nia afirma, sei fahe tuir klase rendimentu ki’ik, médiu no altu inklui desidi tempu atu komunidade ne’ebé hela sai na’in ba uma ne’e.

Dadaun ne’e, Salvador afirma, sira estabelese ona prosesu apresiasaun tékniku entre liña ministeriál sira hanesan Ministériu justisa, Ministériu Finansa inklui MOP. Ba implementasaun, Ministru dehan, sei uza sistema projetu Parseria Públika Privada (PPP) ne’ebé enkoraza ba setór privadu atu investe.

Vizaun revitalisa bairru ne’e, nia haklaken, atu asegura povu asesu ba rai, uma ne’ebé mak dignu no asesu ba infraesturura bázika sira hanesan bee-moos, eletrisidade no saneamentu.

Jornalista: Florensio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here