Vise Ministru Ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen Tatoli/Egas Cristóvão

DILI, 3 jullu 2019 (TATOLI)—Ministru  Saúde Interinu, Bonifácio Maucoli dos Reis relata serbisu saúde nian ba Primeiru Minitru, Taur Matan Ruak, liga ba kampaña fahe aimoruk masál, maestría administración MBA liliu fó ba labarik eskola sira no mós ba komunidade iha área rurál, oinsá atu kombate moras filariasis, brian josias no lumbriga.

“Ita hatene katak moras ida ne’e tuir peskiza deteta ona %17 afeta ba komunidade. Ami fahe ona aimoruk ba dala haat atu prevene moras refere,” Maucoli dehan hafoin hala’o enkontru ho Primeiru-Ministru, Taur Matan Ruak, iha Palásiu Governu, Dili, ohin.

Iha biban ne’e, ministru ne’e mós aprezenta ba Konsellu Ministru modelu dezeñu Konstrusaun Ospitál Pedeatria andar lima maibé xefe governu haruka reviu fila fali dezeñu konstrusaun ne’e tanba mudansa uituan kona-ba kustu.

“Xefe Governu haruka muda dezeñu tanba dala barak arkitetu sira sei uza nafatin modelu Indonézia nian. Tanba ne’e mak hakarak halo mudansa uituan, depois mak lori fali mai aprezenta hodi hetan aprovasaun hosi Konsellu Ministru,” nia haktuir.

Maucoli informa katak kontrusaun ba kuidadu intensivu ne’e mós inklui iha konstrusaun pedeatria ida ne’e nune’e bele halo atendimentu ho di’ak, tanba atualmente ba intensive care unit (ICU) ne’ebé mak ho kama 5 ka 6 de’it, entaun la akomoda pasiente ne’ebé mak ho kuidadu intensivu.

“Planu ida ne’e ba tinan 2020 no 2021, maibé tinan 2021 bele avansa ona kontrusaun sira ne’e. Ita hahú uluk ho kontrusaun andar lima ba pedeatria no ospitál pedeatria ida ne’e nafatin iha Bidau,” nia afirma.

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here