Vise Prezidente Parlamentu Nasional, Maria Angelina Sarmento, akompaña husi Ministru Justisa, Manuel Cárceres, ofisialmente loke Semináriu Nasionál ho tema “A Implementação de Leis da Função Pública e da Sua Implementação”, hodi komemora loron Funsaun Públika ne’ebé monu iha loron 15 jullu 2019, Semináriu ne’e realiza iha CCD iha kinta (4/7). Imajen/Mídia-MJ

DILI, 04 jullu 2019 (TATOLI) – Ministru Justisa, Manuel Cárceres hateten katak tinan lima ona estabelese Funsaun Públika Timor-Leste no durante tinan ne’e Funsionáriu Públiku (FP) sira hala’o kna´ar ho kondisaun no sirkuntánsia oioin, maibé nafatin ho espíritu atu serví povu no nasaun.

Cárceres reforsa, FP sira haluha difikuldade sira ne’ebé enfrenta, supera dezafíu hotu hasoru lorloron, hodi hala’o nafatin kna´ar atu serví povo no rai doben ida ne’e, tanba ne’e presiza reforma lejislativa balun.

“Semináriu ne’e ho intensaun halo reflesaun kle´an, to’o ona tempu halo reforma pakote lejizlativa ne’ebé regula funsionáriu públiku ninia lala’ok. Dalabarak ita hatudu liman ba Funsiunáriu Públiku sira katak laiha profesionalizmu servisu no prudénsia. Maibé, lei ne’ebé fó biban atu hadi´ak funsiunáriu nian bem estar la-kondis ho evolusaun ne’ebé fó tempu ho biban atu funsionáriu sira atu hala’o ninia kna´ar,”  tenik Ministru Cárceres iha semináriu nasionál iha Centro Convencão Díli (CCD), kinta ne’e.

Semináriu Nasionál ne’e ho tema “A Implementação de Leis da Função Pública e da Sua Implementação, no organiza husi Komisaun Funsaun Públika (KFP) ho Komisaun Organizadora Ministériu Justisa (MF) hodi komemora loron Funsaun Públika iha loron 15 jullu 2019.

Governante ne’e dehan, VIII Governu nia estrutura iha Ministériu Reforma Lejizlativa no Asuntu Parlamentár (MRLAP), oras ne’e dadaun ko´alia kona-ba Reforma setór Justisa, tanba ne’e nu’udar ministru ne’ebé responsável ba komemorasaun loron Funsaun Públika, nia dezafia FP sira hodi hare mós ba bem estar (moris di´ak).

“Prioridade Governu, hahú tinan ne’e to’o oin mai (2019-2023), hatúr bem estar hanesan pilar dezenvolvimentu. Bainhira koalia bem estar ba sosiedade timoroan sira, Funsionáriu Públiku hanesan parsela ida husi sosiedade, tanba ne’e nia bem estar tenke tau iha dasi atu tetu, se sira-nia bem estar ne’e lei sira fó ona biban atu sira moris diak ka lae?,” tenik Cárceres.

Nia hatutan: “Tempu ita-boot sira (funsionáriu), dirijente máximu instituisaun estadu atu kria ohin, para depois ita halo anotasaun no aprezenta proposta alternativa sira hodi hadi´k ita-boot sira-nia bem estar”.

Nia anotasaun durante ne’e iha lei sanulu resin ne’ebé regula FP sira nia kna´ar no lala’ok, maibé lei sira ne’e adekuadu nafatin ka lae ho responsabilidade FP atu serví povu no nasaun.

“Ezemplu konkretu bainhira hau tama Ministériu Justisa, Hau ba Vizita Diresoens distritais sira, hau hetan maluk barak.  Estadu investe liuhusi Fundo Dezenvolvimentu Capital Humanu (FDCH), hadi’ak sira nian kapasidade intelektual, fila mai tau sira kampu ida laiha kargu ba sira”, nia dehan.

Nia dehan tan: “Estadu lakon osan, nia lakon nia tempu, nia lakon nia pasiénia ba sai matenek, ita halo degradasaun ba nia matenek, ita dezmotiva nia, para depois nia bele halo servisu di´ak hanesan Funsionáriu Públiku, presiza reforma setór ida ne’e”.

Tanba ne’e, governante ne´e dezafía FP sira hodi hato’o proposta para bele revee situasaun sira ne’e tamba lae FP sira nunka bele sai funsiunáriu ho kredibilidade.

“Kuandu, ita ko´alia ba bem estar ema nian, ko´alia mós bem estar funsionáriu nian. Se lae ita bele halo Lei Antí-Korrupsaun atus ida, maibé ema ida atu implementa lei, ema ida atu aplika lei, mak nia bem estar ita la-kuidadu, lei kaduka to’o tempu. Tanba laiha ema implementa lei ne’e ho seriedade,” nia konsidera.

Jornalista: Julia Chatarina

Editór      : Rafy Belo

HAKEREK NO HATÁN

Please enter your comment!
Please enter your name here