Logotipu Dioseze Dili

DILI, 04 jullu 2019 (TATOLI)-Oras ne’e daudaun, iha Kongregasaun hamutuk  51 mak rejistadu no hala’o misaun iha parókia sira ne’ebé sai mahon husi Dioseze Dili nian.

Vigáriu Episkopál Re-evanjelizasaun ba asuntu relijiozu Dioseze Dili, Amu Leonardo Dibiawiyata,SJ. Imajen/Cipriano Colo

Kongregasaun  hirak ne’e, kompostu husi feminina 41 ho númeru madre hamutuk 454, no mós kongregasaun maskulinu 11 ho númeru padres hamutuk 90, aumenta ho relijiozu (frater no irmaun) hamutuk 205.

Maski la sita kompletu, maibé Vigáriu  Episkopál Re-evanjelizasaun ba asuntu relijiozu Dioseze Dili, Amu Leonardo Dibiawiyata,SJtemi kongregasaun sira maskulinu nian balun mak hanesan, Carmelito (OP), Franciscano (OFM), Franciscano (OFM Cap),  Salesiano Dom Bosco (SDB), Societas Verbi Divini (SVD), Canosiano, Jesuita (SJ), Claretiano (CMF) Irmaun Saun João de Deus, Frater CMM, no seluk tan.

Mezmu Amu Dibio seidauk iha lista kompletu kona bá kongregasaun feminina, maibé iha balun ne’ebé amu temi mak hanesan Carmelita, Canosiana, CIJ, Franciscana, FMA, PRR, Alma no seluk tan.

Padre no madre inklui irmaun relijiozu relijioza hirak ne’e, hala’o misaun iha Dioseze Dili tanba hetan lisensa husi Bispu rasik no oras ne’e Amu Dibio maka responsavel másimu ba asuntu relijiozu atu oinsá koordena serbisu entre kongregasaun sira ho amu Bispu. Tanba ne’e  mak hanaran Vigáriu Episkopál Re-evanjelizasaun ba asuntu Relijiozu Dioseze Dili.

‘‘Ha’u nia knaar atu koordena serbisu entre kongregasaun sira ho amu Bispu,’’ hateten Amu Dibio ba Ajénsia TATOLI, ohin, iha nia rezidénsia Lahane, Dili.

Amu hatutan, misaun prinsipál ne’ebé kongregasaun sira iha maka, haklaken Maromak Nia lia-fuan no  konkretamente hala’o asaun oioin mak hanesan, servisu sosiál, edukasaun  no serbí kbiit laek sira.

Amu esplika mós kona-bá lia fuan kongregasaun ne’e katak, ema relijiozu no relijioza Katólika hirak ne’ebé halibur aan no moris hamutuk ho unidade no objetivu espesiál ida, hodi serbi Maromak no serbí ema.

Jornalista         : Cipriano Colo

Editór               : Francisco Simões

 

HAKEREK NO HATÁN

Please enter your comment!
Please enter your name here