FOKUPERS ho UNFPA fo formasaun ba formandu husi eskola tolu, inklui funsionariu balun husi ME. Imajen/Osoria A. Marques

DILI, 04 Jullu 2019 (TATOLI)-Forum Komunikasaun ba Feto Timor-Leste (FOKUPERS-sigla indonézia) serbisu hamutuk ho UNFPA fó formasaun ba formandu (profesores) husi eskola tolu mak hanesan eskola Pre-sekundaria Fatumeta, Eskola Sekundária Jerál 4 de Setembru UNAMET Dil, Eskola Sekundária Becora, inklui funsionáriu Ministériu Edukasaun (ME).

Koordenadora Konsensializasaun FOKUPERS, Imaculada Gouveia Leite, informa,  partisipante sira iha formasaun ne’e hamutuk  na’in 13, kompostu husi feto na’in ualu no mane na’in lima.

Husi formandu sira ne’e, na’in neen reprezentante husi eskola no na’in hitu (7) representante husi Ministériu Edukasaun

“Formasaun ida ne’e espesiál liu ba ita-nia professores nune’e mós ba funsionáriu sira husi Ministériu Edukasaun atu  prepara sira atu sai hanesan manorin na’in no enkaixa mós ita-nia hanoin no preokupasaun, liuliu ba estudante sira iha eskola atu oinsá sira bele fasilita ka hanorin fali sira nia estudante,” esplika Imaculada Gouveia Leite ba Ajénsia TATOLI, ohin, iha sala formasaun FOKUPERS, Faról, Dili.

Imaculada mós informa katak, formasaun mós nu’udar espasu atu sira bele koñese di’ak liu tan sira nian aan katak “Ha’u nu’udar feto mak oinsá no Nia nu’udar mane mak oinsa” liuliu iha koñesimentu ne’ebé mak kle’an ba iha igualdade jéneru.

Partisipante husi Eskola Sekundáriu Jerál 4 de Setembru UNAMET Dili, Ana Maria dos Santos Brandão, hatete formasaun ne’ebé mak FUKUPERS oferese  kona ba igualdade jéneru ne’ebé importante atu bele orienta ema nia expetativas.

“Ha’u orgullu no sente kontente tebes ho formasaun ne’ebé mak FOKUPERS oferese kona ba igualdade jéneru ne’e atu oinsá ema ho ema dignifika malu nune’e mós oinsá atu bele respeita ema ida nia dignidade no sentimentu umanu,” hateten Ana Maria dos Santos Brandão.

Jornalista      : Osoria A. Marques

Editór             : Francisco Simões

 

 

 

HAKEREK NO HATÁN

Please enter your comment!
Please enter your name here