Eis Segundu Komandante FALINTIL Rejiaun III, Jaime Ribeiro ‘SAMBA SEMBILAN’ (9). Imajen Eugénio Pereira

LIQUIÇÁ, 4 jullu 2019 (TATOLI)—Veteranu Samba-Sembilan nia mate halo ema barak triste, inklui família. Situasaun ne’e, halo família, oan ki’ak no inan-faluk hela ho sentimentu triste.

“Ha’u triste no hanoin barak tebes tanba oan barak. Durante ne’e katuas mak mak fó-haan, maibe nia laiha ona, ha’u atu lori saida mak fo-haan sira,” espoza saudozu Jaime Ribeiro alias Samba-Sembilan, Manuela Pereira Ribeiro, ba Agência TATOLI ho matan-been nakonu, iha Suku Ulmera, Postu Bazartete, Munisípiu Liquiça, ohin.

Durante entrevista, inan-faluk ne’e sempre halerik bainhira husu nia sentimentu kona-ba nesesidade família nian. Saudozu husik hela oan na’in-hitu mak hanesan José Ribeiro, Maia Pereira Ribeiro, Rania Ribeiro, Rojino Jaime Ribeiro, Fiona Ribeiro, Aurélia Ribeiro no oan ikus Jaime Ribeiro.

Hosi saudozu nia oan na’in 7 ne’e, José Ribeiro no Maia Pereira Ribeiro sei eskola iha ensiñu pre-sekundária. Enkuantu, Rania Ribeiro ho Rojino Jaime Ribeiro sei iha ensiñu primária. Fiona Ribeiro, Aurélia Ribeiro no Jaime Ribeiro seidauk eskola.

“Labarik sira ne’e sei ki’ik hotu. Ha’u tuur no hanoin barak loos ba sira,” espoza saudozu Samba-Sembilan ko’alia ho tanis. Aman laiha ona, hanesan feen tenke simu responsabilidade todan ba nesesidade família nian no futuru oan sira-nian.

“Katuas sei moris hanorin nia oan sira, katak aban bainrua sai mane klosan labele eijze ba estadu maibe buka dalan kontribui ba estadu,” haktuir espoza Samba-Sembilan ho matan-been.

Lia menon ne’ebé husik hela halo Manuela Pereira Ribeiro atu ejize estadu laran todan tebes. “Ba ha’u, atu husu, ha’u la husu. Se estadu hanoin nia terus ba rai ne’e, entaun tau-matan ba oan hira ne’e. Família mós sei la taka matan ba ami,” nia hateten.

Iha matebian nia hela fatin, Ulmera, família sira hela ho tristeza. Saudozu Samba-Sembilan ramata ona nia peregrinasaun iha mundu no fila hikas ba hamutuk iha Aman nia kadunan. Adeus Komandante Samba-Sembilan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here