Padre no Madre sira, inklui leigu sira Dioseze Dili nian hala'o avaliasaun pastoral primeiru semestre. Imajen/Espesiál FMA

DILI, 04 jullu 2019  (TATOLI) –Dioseze Dili deside ona tema  “Foku Pastorál” ba tinan ne’e mak “Ide e Proclamai” .

Vigáriu  Episkopál Re-evanjelizasaun ba asuntu Pastorál Dioseze Dili, Padre Juvito do Rego esplika,  dioseze deside hili tema “Ide e Proclamai” tanba haree ba sosiedade ne’ebé tama iha krize identidade boot.

Iha krize identidade ne’e,  Amu Juvito esplika, jerasaun foun sira komesa laiha ona kontrolu sosiál ba nia aan, envolve iha krime organizadu hanesan droga, krime oioin mosu no aumenta ho sofistikadu.

Ho tema ida ne’e Igreja lokál Dioseze Dili hakarak bolu hikas atensaun dehan, la’o bá no proklama Maromak nia liafuan di’ak ba ema hotu.

Liu tan ida ne’e, tenik Amu Juvito, ho pastorál tinan ne’e, hakarak atu restaura ema hodi fila fali ba ninia aan, katak ema hotu ne’e misionáriu.

Nia hatutan, ema hotu iha direitu atu haklaken buat ne’ebé loos, lori valór sira ne’ebé Igreja hanorin, tanba Maromak nia ukun fuan hanorin ema atu halo buat di’ak, Evanjellu mai atu liberta ema husi dalan ne’ebé la loos.

Padre Juvito esplika, Evanjelizasaun ne’e mós atu hanorin no lori ema ba halo servisu, tanba haree ba realidade  ohin loron, ema lakohi ona atu kaer serbisu, hothotu hakarak de’it mak buat lalais (instan).

Programa Pastorál ne’e la’o ona dezde inísiu fulan Janeiru no iha fulan kotuk, pároku sira, membru konsellu parokiál,  relijiozu-relijioza sira husi  vigararia Dili Oeste, Dili Leste, Ainaru, no Aileu hamutuk ho Bispu Dom Virgílio do Carmo da Silva, SDB, hala’o ona avaliasaun ba primeiru semestre no sei kontinua to’o fin tinan ne’e.

Iha Bispu Virgílio nia intervensaun hateten, realidade pastorál dioseze nian  la’ós para de’it iha parókia, maibé tenke to’o iha baze hanesan eskola sira no grupu asosiasaun sira hotu. Tanba realidade sosiál, kulturál, ekonómika no polítika, ohin loron, dezafia ajente pastorál sira atu halo evanjelizasaun.

Iha kontestu ne’e,  Bispu Virgílio, hakarak mós atu bolu atensaun ba ajente pastorál sira hodi hataan ba dezafiu hanesan seita (sekte) sira, problema família, arte marsiál sira, lulik fiar oin-oin ne’ebé mosu tan, no seluk tan.

Amu Bispu mós husu atu ajente pastorál sira kontinua hamosu inisiativa atu halo akompañamentu, liu-liu fó formasaun integradu ba foin sa’e sira.

Fó hanoin mós katak, komisaun pastorál dioseze Dili nian, aprezenta ona tema Pastorál tinan 2020 maka, “Kristaun Eukarístiku, Hodi Kristu, Ho Kristu ba Aman Maromak”.

Tema ne’e ho objetivu atu lori Kristu ba sarani sira no lori sarani sira ba Kristu (Kristaun Kristu séntriku).
Razaun hili tema ida ne’e ba pastorál tinan oin, tanba hateke ba realidade, sarani barak seidauk hatene loloos vida eukarístika, barak sei moris iha selebrasaun superfisiál, selebra Eukaristia maibé seidauk moris iha Eukaristia, seidauk distinge moris sakramentál husi sakramentalia no devosaun, fasil liu tama iha mundu sekulár ne’ebé la fó importánsia ba vida sakramentál, lakon sentidu sinais sensíveis Eukaristia.

Jornalista          : Cipriano Colo

Editór               : Francisco Simões 

HAKEREK NO HATÁN

Please enter your comment!
Please enter your name here