LIQUIÇÁ, 4 jullu 2019 (TATOLI)—Komisaun Organizadora hasai ona ajenda ba prosesu fúnebre ba saudozu Jaime Ribeiro alias Samba-Sembilan.

Prezidente Komisaun Organizadora, Mateus Soares, hateten ajenda ba prosesu funerál fiksu ona tanba komisaun prepara besik ona loron neen. Ajenda ne’e desidi ona entre família saudozu ho estadu katak iha 6 jullu dader, mate-isin sei sai hosi saudozu nia rezidénsia Ulmera.

“Saudozu Samba-Sembilan sai hosi Ulmera ba Komité Sentrál FRETILIN (CCF-sigla portugés) hodi presta omenájen ikus no kontinua ba misa iha Katedrál. Hafoin misa sei liu-ba Jardim dos Herois Metinaro hodi hatuur saudozu,” Mateus ba Agência Tatoli iha Suku Ulmera, Postu Bazartete, Munisípiu Liquiçá, ohin.

Iha Metinaro, nia haktuir, sei marka prezensa hosi veteranu sira, Prezidente Repúblika, Francisco Guterres ‘Lú Olo”, Prezidente Parlamentu Nasionál, Arão Noé de Jesus, Primeiru-Ministru, Taur Matan Ruak, Prezidente Tribunál Rekursu, Deolindo dos Santos, membru governu, juventude rezisténsia no komunidade.

“Responsabilidade família nian to’o iha sesta kalan de’it no sábadu responsabilidade estadu nian,” tenik Mateus Soares.

Hafoin haloot Saudozu Samba-Sembilan, sei iha seremónia haan hamutuk iha Jardim dos Herois Metinaro.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here