Operasaun Konjunta ne'ebé inisia hosi KAK ba veíkulu Estadu ne’ebé halo movimentu iha loron ferias, Sábadu ho Domingu. Imajen/Espesiál KAK

DILI, 04 jullu 2019 (TATOLI) – Reprezentante Asian Justice and Rights (AJAR), Inocencio de J. Xavier, husu ba autoridade operasaun konjunta husi Komisaun Anti Korrupsaun (CAC-sigla portugés), Polisia Nasionál Timor Leste (PNTL), Diresaun Nasionál Transporte no Terrestre (DNTT), no Diresaun Nasionál Patrimóniu Estadu  (DNTE) atu halo mós apreensaun ba sirkulasaun karreta no motor estadu iha nivel munisípiu, inklui Rejiaun Administrativu Espesiál Oe-Cusse Ambeno (RAEOA).

“Ha’u hanoin operasaun konjunta ne’e, labele de’it iha kapital Dili, maibé se bele halo mós iha munisípiu, tanba dala barak uza patrimóniu estadu la tuir nia dalan,” hateten Inocenciao de J. Xavier, ba Ajénsia TATOLI, ohin, iha nia knar fatin Farol, Dili.

AJAR sujere tanba operasaun konjunta hatudu polítika prevensaun ba krime pekulatu de uzu ne’ebé mak previstu iha artigu 296 kódigu penal Timor Leste. Ho razaun, atu salva guarda ba osan estadu nian liuliu ba kombustivel hodi atinje objetivu pesoál no manutensaun karreta no motor nian.

Nia sujere  ba funsionáriu estadu sira ne’ebé mak hala’o serbisu estadu nian, antes nee tenke halo ona karta deklarasaun ba orden traballu hodi hetan rekoñesimentu husi operasaun konjunta, nune’e laiha dezentendimentu atu lalika prosesa malu ba Tribunal.

AJAR sujere ba funsionáriu sira atu lalika lori karreta ka motor estadu, fora  husi loron serbisu, se lae hetan husi operasaun konjunta mak sei hasoru lei.

AJAR dezafia no fó parabens ba operasaun konjunta, tanba ho sira nia serbisu bele tulun no ajuda ona estadu ninia patrimóniu no osan.

Jornalista  : Domingos Piedade Freitas        

Editór        : Francisco Simões

HAKEREK NO HATÁN

Please enter your comment!
Please enter your name here