Diretor Árbitrajen Feerasaun Futeból Timor - Leste (FFTL), Aniceto Berlelo

DILI, 4 jullu 2019 (TATOLI)—Diretór Árbitrajen Feerasaun Futeból Timor-Leste (FFTL), Aniceto Berlelo, informa iha loron 12-16 jullu tinan ne’e, estrutura Fédération International Football Assosiation (FIFA) sei halo avaliasaun ba árbitru timoroan hirak ne’ebé hetan ona formasaun kona-ba árbitru durante ne’e.

Aniceto dehan, durante semana ida iha Timor-Leste, delegasaun FIFA sei halo avaliasaun liu-ba árbitru hirak ne’ebé dirije jogu Liga Futeból Amadora (LFA).

“Tinan-tinan, ita-nia árbitru sira sempre hetan formasaun hosi estrutura FIFA. Entaun, tinan ida ne’e, sira mai atu halo avaliasaun kona-ba matéria hirak ne’ebé ita-nia árbitru sira durante ne’e simu ona, liliu oinsá sira dirije jogu sira hanesan Liga Futeból Amadora (LFA) no jogu seluk-tan ne’ebé iha,” nia haklaken ba jornalista sira iha edifísiu FFTL, Bairru Formosa, Dili, ohin.

Nia hatutan, avaliasaun ne’e hodi haree diretamente ba prestasaun árbitru sira nian iha kampu la’o tuir regra ne’ebé iha ka lae. Tanba durante jogu LFA hahú hosi époka primeiru to’o époka kuartu, klube barak sempre halo protesta hasoru desizaun hirak ne’ebé árbitru sira foti ba jogadór.

“Durante jogu, klube sira barak halo protesta tanba fallansu hosi árbitru. Ida ne’e mak sira hosi FIFA mai haree. Kona-ba sala ne’e ha’u hanoin normál tanba árbitru internasional sira de’it mós halo sala,” tenik Berlelo.

Entretantu, hahú hosi tinan 2003 to’o ohin loron, totál árbibru hamutuk atus ida sanulu resin lima (115) maibé dadaun ne’e na’in sanulu resin neen mak dirije jogu LFA no Tasa 12 de Novembro.

“Ita-nia árbitru sanulu resin neen (16) mak agora dirije jogu LFA. Sira ne’e simu orientasaun direta hosi estrutura FIFA nian tanba FIFA haree sira ne’e iha duni kapasidade atu dirije jogu,” nia hakotu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here