Sesaun plenária iha Parlamentu Nasionál. Imajen dok. Tatoli

DILI, 3 jullu 2019 (TATOLI)—Parlamentu Nasionál desidi ona tempu resesu ba deputadu sira fulan rua hahú hosi loron 15 jullu to’o 15 setembru 2019, maibé ho aprezentasaun alterasaun ezbosu lei Fronteira Marítima (FM) iha semana ne’e entaun deputadu sira sei lakon diretu fulan ida ba resesu.

Prezidente Bankada opozisaun Partidu Demokrátiku (PD), António da Conceição haktuir katak ezbosu lei sira ne’e sei mai agora depende ba Prezidenti Parlamentu Nasionál mak desidi tanba agora deputadu sira prepara-án atu tama ba resesu.

Tuir nia katak regulamentu PN nian defaktu hateten ona deputadu sira tinan ida sei hetan resesu fulan rua, maibé tenki hare mós saida mak nasaun ne’e infrenta no husu kontribuisaun deputadu sira nian di’ak liu tenki fo.

“Ami PD la importa ho resesu kuandu asuntu estadu nian hein hela kontribuisaun no kolaborasaun deputadu nian. Laiha resesu mós ba ami laiha buat ida,” nia dehan ba Tatoli iha PN, ohin.

António afirma katak loron 30 agostu 2019 nu’udar loron ne’ebé termina ona atu halo ratifikasaun ba tratadu FM. Signifika, tinan 20 konsulta populár ne’e ei hetan ninia nível ida aas liu ho ratifikasaun tratadu Tasi Timor.

Nune’e mós, Vise Prezidente Komisaun A trata Asuntu Konstitusionál no Justisa, Francisco de Vasconselho haklaken katak iha tempu resesu ne’e sira sei simu ezbosu lei 5 hosi governu para atu debate. Tan ne’e, PN sei halo alterasaun ba lei sira ne’e para bele hetan ratifikasaun.

Entretantu, deputadu bankada opozisaun FRETILIN, Fabião Oliveira hateten sira sei lakon direitu fulan rua nian iha tempu resesu se governu aprezenta duni ezbosu lei para atu diskute iha Parlamentu Nasionál.

Fabião dehan resesu fulan rua ba deputadu sira ne’e la’ós atu ba toba tiha, maibé kontinua hala’o nafatin serbisu PN iha li’ur inklui halo estudu komparativa no halo kontatu eleitorál ho leitór sira ne’ebé hili deputadu sira mai tuur iha PN ne’e.

Nia hatutan PN durante tempu resesu iha Komisaun Eventuál purvolta deputadu na’in 23 kontinua mantein karik iha reuniaun urjente ruma sira bele atende kedas no seluk ba hala’o serbisu iha li’ur.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here