Prezidente Federasaun Siklizmu Timor-Leste (FCTL-sigla portugés), Angelo Henrique

DILI, 3 jullu 2019 (TATOLI)—Prezidente Federasaun Siklizmu Timor-Leste (FCTL-sigla portugés), Angelo Henrique informa, Governu liuhosi Sekretaria Estadu Juventude no Desportu (SEJD) aloka ona orsamentu ho montante  rihun $10 ba FCTL atu realiza Kampionatu Nasionál.

Nia dehan, FCTL sei realiza Kampionatu Nasionál iha fulan oin ho objetivu atu bele hili atleta hirak ne’ebé prestasaun di’ak para partisipa iha eventu internasionál (Sea Games) ne’ebé sei realiza iha Manila-Filipina, setembru tinan ida ne’e.

“Governu fó apoiu ona ami. Ne’ebé, ha’u hanoin jullu nia laran ne’e Kampionatu Nasionál ita bele hala’o ona hodi haree atleta hirak ne’ebé di’ak ita bele hili hodi partisipa iha Sea Games,” tenik Angelo ba Agência Tatoli iha edifísiu SEJD, Lecidere, Dili, ohin.

Nia haktuir, eventu nasionál ne’ebé atu realiza sei partisipa hosi atleta munisípiu maibé atleta siklizmu maioria konsentra liu iha Dili. “Ita haree siklizmu barak liu konsentra de’it iha Dili, maibé rejistrasaun konserteza munísipiu mós iha hanesan Lautém, Manatuto, Baucau no seluk tan,” Angelo esplika.

Entretantu, dadaun ne’e FCTL halo hela rejistrasaun ba atleta ne’ebé hakarak partisipa iha Kampionatu Nasionál refere. Tinan ida ne’e, FCTL sei haruka atleta siklizmu na’in tolu mak sei partisipa iha Sea Games hamutuk ho ofisiál na’in ida.

Tuir dadus ne’ebé FCTL iha, siklizmu iha Timor-Leste hamutuk atus-ida resin maibé iha tinan 2016 mai leten komesa diminui ona tanba atleta balun idade ona.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here