Xanana Gusmão ho nia soldadu sira iha kampu batalla. Imajen espesiál

LIQUIÇÁ, 2 jullu 2019 (TATOLI)—Komandante Pasqual Ximenes Pereira alias Nicson, haktuir operasaun Kikis ne’ebé militár Indonézia lansa iha Aitana (área Viqueque), Komandante Railakan mak salva Kay Rala Xanana Gusmão hosi situasaun perigu.

“Sé Xanana mak mate, ita la hatene. Ita ohin loron ita ukun aan ka ita la hatene. Maibé, grasa Maromak nian saudozu Railakan, ema ida ne’ebé Maromak kala hatudu para depois bele ba hetan Xanana depois sai hanesan salvaguarda ba Xanana iha situasaun difísil iha Aitana,” Komandante Nicson konta ba Agência TATOLI, iha Suku Ulmera, Postu Bazartete, Munisípiu Liquiçá, tersa (2/7).

Komandante Nicson la disponível esplika klaru kontinuasaun hosi serku Aitana no promete katak tempu ida sei konta ba ema hotu hodi hatene, tanba momentu ne’ebá situasaun difísil.

“Momentu ne’ebá inimigu buka dalan oioin para oho tiha Xanana, maibé la hatene, ami mak biru maka’as ka Maromak mak tulun nia ka ami-nia sorte mak liu. Ami buka meiu halo nusá para lori sai nia, ne’e akontese iha fatin hotu-hotu,”  nia haktuir.

Tuir Nicson, momentu serku Aitana iha tinan 1981, bolu dehan operasaun Kikis, ne’e loromonu no lorosa’e ataka hotu, labarik sira eskola iha primária, ensiñu sekundáriu ba leten ne’e ataka hotu FALINTIL iha Aitana.

Nia dehan, saudozu Railakan ho saudozu Samba-Sembilan mak asegura Komandante En-Xefe, Kay Rala Xanana Gusmão iha altura ne’ebá.

Nia haktuir, iha situasaun perigu, sira na’in-rua (Railakan no Samba) mak hanesan sumbriña ba Xanana Gusmão, katak kuandu iha besik, ida tenke hosi dook hosi haree dalan.

“Atu asegura halo nusá no lori sai halo nusá, atu ba ne’ebé, ha’u labele fó-sai maski ita ukun-aan ona. Tempu ida ami sei konta ba imi hotu.  Tanbasá la fó-sai ne’e, jornalista kalma xa. Tempu ita hotu sei akompaña. Ita-nia istória ne’e barak tebes. Ida ne’e ha’u konta saida mak ha’u hatene,” tenik Komandante Nicson ne’ebé momentu ne’ebá asumi kargu Asistente Polítika Rejiaun III.

Jornalista: Evaristo Soares Martins

Editór: Xisto Freitas

2 KOMENTÁRIU

  1. Sugestaun, favor ba husu mos Sr Xanana atu hatan los ga lae molok fo sai artigu ne’e tamba nia sei moris hela. Jornalista presiza buka informasaun nebe ho balansu no labele fo sai kuandu ema ida deit mk konta nia istoria rasik ladun eduka jerasaun foun i halo jerasaun foun sira konfuzaun liutan. Abc

  2. Mas Hau Dezafia 8an….Mas Se bele Fosai tok Semak Iha Momento neba Maun boot Xanana Fo komfiasa ba se Kaer Dokumentus Nasaun Nia nebe Maun boot Xanana iha Altura neba Serku Aitana….nee….maunboot Xanana Fo orientasaun ba See e Ema nee see e Sei Moris kalae…..

    Karik Ema nee Sei iha …..nusa mak Latemi nia Naran…..e Ema nee Sei Moris Kalae….

    Konta lolos mai Ami Jerasaun Foun Rona tok

HAKEREK NO HATÁN

Please enter your comment!
Please enter your name here