Xefe Bankada Partidu Demokrátiku (PD), António da Conçeição ‘Kalohan'. Imajen TATOLI/António Gonçalves

DILI, 2 jullu 2019 (TATOLI)—Prezidenti Bankada Partidu Demokrátiku (PD), António da Conceição hateten ninia parte prontu apoiu esforsu ne’ebé governu liuhusi Xefe Negosiadór Prinsipál Delimitasaun Fronteira Marítima (FM), Xanana Gusmão luta ona hodi hatuur hikas soberania Timor-Leste nian ho loloos.

Deputadu António dehan Xefe Negosiadór rasik husu ba ninia partidu atu fó apoiu tomak ba esforsu ne’ebé estadu no governu halo dadaun. Apoiu ne’ebé presiza atinje mak ratifikasaun tratadu FM, tanba iha lei hamutuk 12 mak governu sei aprezenta ba PN iha tempu basik.

“Xanana husu Partidu Demokrátiku atu apoiu ratifikasaun tratadu FM ne’ebé sei realiza iha 30 agustu 2019,” tenik nia iha Parlamentu Nasionál, tersa (02/07).

Nia esplika, lei 12 ne’ebé presiza halo alterasaun formalmente foin anúnsia hosi Xefe Negosiadór Prinsipál Delimitasaun FM bainhira nia partisipa iha enkontru G7+ iha Portugal. Maibé, ofisialmente hosi governu rasik to’o agora seidauk publika.

Eis Ministru Edukasaun ne’e akresenta probavelmente Parlamentu Nasionál (PN) presiza ratifika tanba lei 12 ne’e lei anteriór nian kona-ba Joint Petroleum Development Area (JPDA). Lei JPDA ne’e kuandu altera ona sei loke vantajen atu haree mós Lei Fundu Petrolíferu nian.

António salienta kuandu prosesu lei ne’e hetan ona alterasaun entaun sei haree fali mós lei komérsiu no reseita nian tanba lei rua ne’e mós tenke altera nune’e bele loke dalan ba investimentu tama iha Timor.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here