Ministru Transporte no Komunikasaun (MTK), José Agostinho da Silva

DILI, 3 jullu 2019 (TATOLI)—Ezekusaun orsamentu jerál Estadu (OJE) 2019 hosi Ministériu Transponte no Komunikasaun (MTK) agora dadaun atinje ona pursentu 39.7.

Relatóriu ezekusaun orsamentu ne’ebé Agência Tatoli asesu liuhosi Portál Transparénsia Governu Timor-Leste haktuir ezekusaun OJE 2019 MTK ho montante orijen tokon $7.628.070,00, kompromisu sira $1.540.795,73, obrigasaun sira $1.278.494,02, atuál $1.750.415,59, saldu $3.058.362,66 no ezekusaun 39.7.

“Ezekusaun orsamentu jerál Estadu tinan 2019 ba MTK oras ne’e dadaun atinje ona pursentu 39.7,” informa Ministru Transporte no Komunikasaun, José Agostinho da Silva ba Agência Tatoli iha Palásiu Governu, ohin.

Nia dehan, orsamentu ne’ebé alokadu labele gasta arbiru maibé tenke kontrola tuir programa ne’ebé mak planeadu no aprovadu hosi Parlamentu Nasionál.

“Ne’ebé, ha’u hanoin programa ne’e barak. Ha’u labele temi programa saida mak ita halo ona maibé ita tenke kontrola ninia ezekusaun katak labele gasta arbiru—tenke kontrola tuir programa ne’ebé mak planeadu,” Agostinho esplika.

Ministru MTK fiar katak molok to’o 31 dezembru 2019, ezekusaun orsamentu bele ezekuta to’o pursentu 100 ona.

Kona-ba orsamentu tinan 2020, governante ne’e esplika, montante nia parte seidauk bele hateten uluk maibé depois bele haree iha jornada orsamentu.

José Agostinho haklaken iha tinan 2020, liga ba prioridade ne’ebé ministériu ne’e planeia mak oinsá prepara infraestrutura hanesan terminál rejionál, munisípiu, infraestrutura aeruportu no portu rejionál sira.

“Ida ne’e importante tebes. Primeiru, ita tenke iha lai kondisaun ba infraestrutura depois mak ba oin ita bele haree kuandu aeruportu di’ak ona oinsá aviaun bele mai, oinsá mak kareta bele movimenta,” nia subliña.

Jornalista: Nelson de Sousa

Editór: Xisto Freitas

HAKEREK NO HATÁN

Please enter your comment!
Please enter your name here