Diretór Regulasaun Komersiál no Protesaun Konsumidór, Domingos Guterres

DILI, 2 jullu 2019 (TATOLI)—Ministériu Turizmu, Komérsiu no Indústria (MTCI-sigla portugés) liuhusi Diresaun Regulasaun Komersiál no Protesaun Konsumidór dezenvolve hela Ezbosu Lei Mikro Empreza Ki’ik nune’e bele regula ema estranjeiru sira ne’ebé hala’o atividade negósiu ki’ik iha rai laran.

“Asuntu ida ne’e importante tebes tanba dadaun ne’e ita-nia maluk negosiante no emprezáriu timoroan sira preokupa tanba ema estranjeiru barak mai iha Timor-Leste hala’o atividade negósiu ki’ik iha rai laran hanesan loke kioske, restaurante no seluk-tan ne’ebé timoroan sira bele halo no aleinde ne’e maluk negosiante estranjeiru sira tama to’o iha merkadu tradisionál sira. Ne’e duni, MTCI sei hamosu Ezbosu Lei Mikro Empreza Ki’ik nune’e bele regula negosiante estranjeiru,” dehan Diretór Regulasaun Komersiál no Protesaun Konsumidór, Domingos Guterres ba Agência Tatoli iha nia kna’ar fatin, Mandarin, Dili, tersa (2/7).

Nia esplika, ezbosu lei ne’e ho intensaun atu defini loloos atividade ida ne’ebé mak ema estranjeiru bele halo liliu tenke mai ho kapitál boot atu investe nune’e fo kampu traballu ba timoroan.

“Ho kriasaun ezbosu lei ne’e bele hatuur nia prosedimentu ne’ebé di’ak atu haree ida ne’ebé merese sai mikro empreza ki’ik no mós fó serbisu ba ema ne’e oinsá no direitu saida mak hosi mikro empreza ki’ik sei halo,” Domingos haklaken.

Nia informa, sira haruka ona ezbosu lei ne’e ba órgaun balun maibé dadaun ne’e seidauk iha diskusaun ne’ebé di’ak, maibé hosi parte MTCI liuhusi Diresaun Regulasaun Komersiál no Protesaun Konsumidór iha ona koordenasaun serbisu ho autoridade munisipál, autoridade komunitária iha munisípiu sira, akadémiku no emprezáriu nasionál kompartilla halo sensibilizasaun ba lejizlasaun refere.

Tanba ne’e, nia espera katak iha tempu oin mai bele avansa lejizlasaun ne’e ba iha Parlamentu Nasionál atu deskuti nune’e bele minimiza atividade negósiu hosi ema estranjeiru.

Jornalista: Nelson de Sousa

Editór: Xisto Freitas

HAKEREK NO HATÁN

Please enter your comment!
Please enter your name here