Quintiliano A. Belo

DILI, 3 Jullu 2019, Opiniaun (TATOLI)–Kompromisu polítika Aliansa Maioria Parlamentár-AMP nian hodi kria kampu de servisu 60.000 ba Timor oan sira iha Timor- Leste sai tópiku importante no trendy iha diskursus, media face book, jornais no blog anónimu sira.  Tópiku nee sai importante no trendy liu tan bainhira Ministru Fidelis Magalhães reprezenta governu, afirma kometimentu ne’e iha Parlamentu Nasionál tuir polítika ne’ebé Governasaun AMP lori hodi liberta povu husi kiak no mukit iha Timor Leste.

Loss duni katak,  kompromisu durante kampaña nu’udar tusan ida ne’ebé AMP tenke selu tuir programa polítika ne’ebé AMP rasik komunga. Tanba ne’e Governu daualuk ne’ebé lidera husi PM Taur Matan Ruak liu husi Ministériu das Obras Publikas no Ministériu sira seluk esforsu-an hodi atinje promesas hirak ne’e liu husi implementasaun programa fíziku ho setór privadu hodi dezenvolve no hadi’ak kondisaun moris sidadaun sira nian liu-liu sira ne’ebé  hela iha area rural.

Nune’e liu husi programa hanesan R4D no projetu fíziku sira seluk ne’ebé  daudaun nee implementa hela, Governu daualuk kompremetidu atu implementa promesas polítika AMP nian hodi kria kampu de servisu ba Timor oan sira iha area rural no urbana hanesan rezultadu balun hatudu daudaun tuir mai ne’e:

  1. Iha tinan 2016, 2017 no 2018 tuir relatóriu husi programa estrada rural R4D liu husi Ministériu das Obras Publica halo manutensaun ba Estrada rural hamutuk 389.5 kilómetru. Husi total kilómetru ne’e, kada kilómetru absorve ona médiu ka rata-rata 220 trabalhores tantu feto, mane no ema defisiente hamutuk 85.690 pesoál iha territóriu Timor laran tomak. Ezemplu konkretu maka; hanesan iha Saburai, implementasaun R4D ho kilómetru 17 ital konsege fó servisu ba trabalhadores hamutuk 3734 pesoál. (ILO-DNEPCC, 2019)
  2. Iha tinan 2019, Ministériu das Obras publika liu husi aprovizionamentu halo tan konkursu públiku ba setór privadu sira hodi kompete projetu fíziku no la’ós fíziku hanesan tuir mai;
  3. Estrada rural R4D 66 pakote ho total 550 kilómetru iha territóriu Timor-Leste. Imajina kada kilómetru maka konsege absorve médiu ka rata-rata 220 trabalhador, hanesan tinan sira antes, Ministériu das Obras Publika de’it halo ona realidade promesas 60000 trabalhor iha kada tinan no konsege liu tiha ho total hamutuk 121000 trabalhadores iha territóriu Timor Laran tomak iha de’it tinan 2019. (Entrevista RTTL. Arch. Salvador Pires, Ministru MOP, 2019).
  4. Projetu hanesan Bee Mos ne’ebé loke hela konkursu ho númeru 32 pakote ho nia kalkulasaun mak, Kada pakote sei konsege absorve médiu ka rata-rata 300 pesoál. Nune’e 32pakotes x 300 pesoál sei absorve ona 9600 ital trabalhadores.
  5. Projetu Manutensaun Estrada Munisípius no Nasionál hamutuk 23 pakotes. Kada pakote sei konsege absorve médiu ka rata-rata 300 pesoas maka trabalhador hamutuk 6900ital sai benefisiáriu direta no indireta.
  6. Servisu Konsultoria Estrada, pontes no abitasaun hamutuk 22 pakotes. Estimasaun katak médiu ka rata-rata 75 pesoas kada pakotes, bele absorve kuaze 1.650 trabalhores.
  7. Servisu Fornesimentu material Bee Mos, Eletrisidade no seluk tan hamutuk 18 pakotes. Estimasaun katak médiu ka rata-rata 50 pesoas kada pakotes, bele absorve 900 trabalhores.

Númeru hirak ne’e nu’udar matemátika simples ne’ebé  públiku tenke hatene antes komenta ou kritika polítika Governu nian. Basa, maioria públiku nia presepsaun kona ba polítika kriasaun empregu maka tenke halo rekrutamentu ofisial no servisu iha edifísiu laran ho AC, maibé sira haluha tiha katak servisu hirak ne’ebé  akontese ou lao daudaun iha area rural mosu tanba ezekusaun programa ne’ebé  governu halo liu husi setór privadu ne’ebé  bele mós emprega Timor oan  sira hodi finaliza programa hirak ne’e tuir tempu determinadu.

Iha sorin seluk públiku lahatene kada projetu ne’ebé  empreza sira hetan, presiza trabalhores sira tantu mane, feto no ema defisiente sira. Ho nune’e maka Governu daualuk ne’ebé  lidera husi Taur Matan Ruak fiar-an nafatin hodi hateten no reitera kometimentu katak, programa hirak ne’ebé  iha ona faze ezekusaun Governu sei atinje no sei hetan trabalhores ho surplus. Ezemplu maka Estrada rural de’it iha tinan 2019 sei absorve 121000 trabalhadores iha Timor laran tomak no seidauk sira seluk, liu husi programa sira ne’ebé  Ministériu das Obras publika implementa hela.

Imajina, kada programa no kada Ministériu ne’ebé  iha governu daualuk utiliza kalkulasaun ne’ebé  hanesan, iha tinan ida de’it, Governu daualuk realiza dunik promesa hodi elimina númeru kiak no mukit iha Timor-Leste.

Quintiliano A. Belo

Diretór Nasionál de Aprovizionamentu-MOP

HAKEREK NO HATÁN

Please enter your comment!
Please enter your name here