Komunidade Suku Ulmera dada bandeira meia haste ba saudozu Jaime Ribeiro alias Samba-Sembilan. Imajen Agência Tatoli/Evaristo Soares Martins

LIQUIÇÁ, 2 jullu 2019 (TATOLI)—Komunidade Suku Ulmera, Postu Administrativu Bazartete, Munisípiu Liquiçá, lutu ba saudozu Jaime Ribeiro alias Samba-Sembilan (9) liuhosi dada bandeira meia haste.

‘’Merese duni dada bandeira meia haste (setengah tiang-termu Indonézia) ba saudozu Samba-Sembilan, tanba ninia sakrifísiu ba luta naruk ne’e todan tebes, tanba nia mós hanesan aman lutadór ba rai ida ne’e. Ema balun la luta no ukun tinan-lima de’it bele, nusá mak Samba-Sembilan labele,” Asistente Polítika Rejiaun III, Pasqual Ximenes Pereira alias Nicson, ba Agência TATOLI, iha Suku Ulmera, Postu Bazartete, Munisípiu Liquiçá, ohin.

Iha fatin hanesan, Xefe Suku Ulmera, Martinho Correia, informa dada bandeira meia haste ne’e hanesan sentidu kle’an ba saudozu Samba-Sembilan.

“Ne’e katak eroi ne’ebé koñesidu, tanba nia timoroan, Ulmera oan, Liquiçá oan luta mós ba rai ida ne’e. Bandeira meia haste ne’e fó mós koñesimentu katak aman lutadór ida mate ona,” dehan Xefe Suku Ulmera ne’e.

Iha parte seluk, joven rezisténsia hanesan mós Ulmera oan, Guntur, hateten, razaun dada bandeira iha klaran de’it tanba Samba-Sembilan mós fó kontribuisaun maka’as ba prosesu funu ida ne’e to’o ramata.

“Ida ne’e ami hatudu ami-nia omenájen ikus ba saudozu Jaime Ribeiro Samba-Sembilan,” dehan joven rezisténsia ne’e.

Nune’e mós, joven Joni Pereira, hateten sentidu ida ne’ebé hatudu liuhosi dada bandeira meia haste hodi respeita saudozu Samba-Sembilan nia luta.

“Aman lutadór ida mate ona, entaun ami hotu-hotu iha Ulmera fó omenájen. Ami lutu to’o prosesu funerál. Laiha ema ida mak orienta ami, maibé ami mak iha sentimentu no ida ne’e hanesan inisiativa rasik, maski seidauk hetan autorizasaun hosi estadu,” tenik Joni.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here