Komandante Pasqual Ximenes Pereira alias Nicson

LIQUIÇÁ, 2 jullu 2019 (TATOLI)—Komandante Pasqual Ximenes Pereira alias Nicson triste ho kondisaun moris veteranu no família veteranu sira, tanba la hetan atensaun másimu hosi estadu.

“Hanesan realidade hatudu ona, Komandante Ular Rihik sei moris, ministru mós presiza, prezidente mós presiza, maibé mate, nia feen ho oan sira ne’e moris ladi’ak. Ha’u hanoin karik Samba-Sembilan mak kontinua nune’e, ha’u triste liu-tan tanba ha’u mai iha uma, ami ho kolega lubuk ida mai beibeik ne’e, ha’u ho Aquito ko’alia hanesan ne’e, Samba nia mate de’it ema ladún preokupa, kuandu haloot ona, ema preokupa oan sira ka lae. Ita hotu hein to’ok  saida mak akontese aban bainrua,”  Nicson ba Agência TATOLI, iha Suku Ulmera, Postu Bazartete, Munisípiu Liquiçá, tersa (2/7).

Komandante Nicson lamenta ho estudu komparativu ne’ebé governu ho Parlamentu Nasionál halo iha rai-li’ur, liliu haree situasaun veteranu rai seluk nian hanesan iha Indonézia no Austrália maibé tinan 17 ona situasaun moris ba veteranu Timor-Leste nian la muda.

“Veteranu sira ne’e hanesan ita-nian ka lae. Ami iha ai-laran bolu dehan ‘a política arte de mentira’, katak labele dehan fó valór para halo kontente, gava ita para depois halo kontente, maibé realidade halo nusá para veteranu mate lalais para podér hotu monu iha ita-nia liman depois halo sasán tuir ita-nia gostu,” nia lamenta.

Veteranu ne’e triste liu-tan bainhira situasaun saudozu Ular nian kontinua akontese ba família no oan ki’ak hosi Samba-Sembilan nian.

“Ha’u sente triste kuandu ninia oan sira sei kii’k-oan, seidauk hatene halo to’os, seidauk hatene halo natar, hatene han de’it. Parlamentu, ministru, jenerál sira, sira mak iha kompeténsia haree ba ida ne’e,” katak Komandante Nicson.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here