Prezidente Federasaun Tiru Timor-Leste (FTTL), António Ximenes

DILI, 3 jullu 2019 (TATOLI)—Prezidente Federasaun Tiru Timor-Leste (FTTL), António Ximenes hateten, Alemaña liuhosi International Shooting Sport Federation (ISSF-sigla Inglés), ajuda ona kilat ho marka Air Refere haat (4) no Air Pistol haat (4) hamutuk ualu (8) hodi fasilita FTTL nia treinamentu.

“Federasaun prepara di’ak tebes tanba iha ona kilat rasik hanesan Air Refere haat (4) no Air Pistol haat (4) ne’ebé agora atleta iha na’in neen mak treinu hela,” tenik António ba Agência Tatoli iha edifísiu Sekretaria Estadu Juventude no Desportu (SEJD), Lecidere, Dili,  ohin.

Nia esplika, atleta FTTL maioria sivíl no treinadór mak mai hosi FALINTIL-Forsa Defeza Timor-Leste (FFDTL). Tanba ne’e, tuir nia, FTTL preparadu atu kompete iha eventu internasionál (Sea Games) ne’ebé sei hala’o iha setembru mai ne’e iha Manila-Filipina.

Iha eventu refere, António tenik, FTTL sei haruka atleta na’in tolu (3) hodi partisipa. “Federasaun prepara ema na’in 6 mak atu ba tuir, maibé Sekretaria Estadu Juventude no Desportu (SEJD) ho Komité Olímpiku Nasionál Timor-Leste (CONTL-sigla portuges) desidi tenke haruka ema na’in 3 de’it—treinadór 1 no atleta na’in rua (feto 1, mane 1),” dehan António.

Dadaun ne’e, atleta sira hala’o hela treinamentu iha esifísiu Fundasaun Falur Rate Laek nia kotuk, Palapaço, Dili.

 Aleinde ne’e, iha agostu tinan ne’e, atleta FTTL hetan oportunidade hodi hala’o treinamentu iha Jakarta, Indonézia.

“Fulan agostu mai ne’e, atleta tiru nian na’in 2 (feto 1 no mane 1) sei partisipa treinamentu ida iha Jakarta nune’e bele hasa’e di’ak liu-tan sira-nia kapasidade,”  nia informa.

FTTL harii iha tinan 2012 no hetan ona rekoñesimentu hosi Governu Timor-Leste, CONTL no Konfederasaun Desportiva Timor-Leste (CDTL-sigla portugés).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here