Prezidente Repúblika, Francisco Guterres Lú Olo akompaña husi Vice Ministru Edukasaun Juventude no Desporto, João Zacarias observa direita kondisaun estudante sira iha Eskola Ensinu Básiku Públiku Ogues-Covalima tuir aprendizajen tuur de’it iha azuleizu leten, kinta (27/06). Imajen/Tatoli/Eugénio Pereira

DILI, 03 juñu 2019 (TATOLI) – Gabinete Prezidénsia Repúblika (GPR) ho Ministériu Edukasaun (ME), kinta aban (04/07/2019), sei arranka ba Munisípiu Covalima hodi lori karteira hamutuk 300 liu hodi fó apoiu ba Eskola Ensinu Báziku Públiku (EBP) Suku  Ogues, Postu Administrativu Maucatar, Munisípiu Covalima.

 Karteira sira ne’e lori ba hodi responde ba preokupasaun Xefe Estadu Francisco Guterres Lú Olo bainhira hala’o vizita serbisu ba Eskola Ensinu  Báziku  refere, kinta (27/06/2019), haree diretamente estudante sira tuur de’it iha rai mak tuir aprendizajen.

 “Gabinete Prezidénsia Repúblika ho Ministériu Edukasaun halo ona preparasaun atu lori kadeira no meza (karteira) purvolta 300-liu,” informa Ministra Edukasaun Juventude no Desportu, Dulce de Jesus Soares, ohin, ba Ajénsia TATOLI iha Palásiu Governu, Dili.

Ministra Dulce dehan, Governu rasik rekoñese eskola barak sei falta karteira, tanba ne’e Governu lori karteira ne’e hodi rezolve difikuldade ne’ebé Eskola Ensinu Báziku Públiku Ogues-Covalima enfrenta.

Ministériu Edukasaun mós prevee iha Orsamentu Jerál Estadu 2020 atu sosa tan karteira hodi fó apoiu ba eskola hotu ne’ebé sei menus karteira.

“Ba orsamentu 2020 ita prevee mós orsamentu hodi sosa tan kadeira no meza purvolta 30,000 too 40,000,”  informa Dulce  de Jesus Soares.

Nia dehan, Ministériu Edukasaun mós identifika eskola iha territóriu hamutuk rihun ida liu mak sei menus karteira, livru inklui kondisaun infraestrutura eskola la di’ak atu bele hahú hadi’a  tuir planu orsamentu.

 Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here