Ministru Justisa, Manuel Cárceres da Costa. Imajen/António Gonçalves

DILI, 03 jullu 2019 (TATOLI)—Governu Timor-Leste hahú hala’o negosiasaun diplomasia ho Governu Indonézia ba kazál timoroan ne’ebé hetan kapturasaun iha Afándega Mota-Ain (Indonézia) tanba lori droga ba Atambua-Indonézia.

Ministru Justisa, Manuel Cárceres da Costa, dehan governu liuhusi Embaixadór Timor-Leste iha Indonézia hala’o hela esforsu hodi halo negosiasaun ho governu Indonézia atu bele salva direitu fundamentál moris sidadaun na’in rua ne’e.

“Ita esforsu hela halo negosiasaun diplomasia tuir mekanizmu legál tanba ita labele obriga Indonézia tuir ita nia hakarak. Tanba ita-nia ema ne’e (kazál) viola ema nia lei no sira mak tenke aplika sira nia lei,” dehan Ministru Cárceres hafoin ramata partisipa enkontru Konsellu Ministru iha Palásiu Governu-Dili, ohin

Governante ne’e dehan Governu hala’o negosiasaun diplomasia de’it, maibé labele impoin tanba prosesuál judisiál ne’e tuir Indonézia nian.

Hatán ba prepara advogadu, Cárceres tenik, Governu halo nia kna’ar tuir kompeténsia no polítika mak diplomasia no karik prosesu la’o sira (Indonézia) husu advogadu, Timor-Leste sei haruka advogadu ba.

Tanba ne’e, nia afirma, dadaun ne’e Governu, Ministériu Públiku no Tribunál Rekursu akompaña hela tanba kazu refere oras ne’e sei iha faze investigasaun—seidauk hala’o julgamentu iha Tribunál Indonézia.

“Ita labele ansi tanba bele estraga ita-nia sidadaun rua ne’e. Di’ak liu ita la’o tuir prosedimentu atu Estadu Indonézia bele respeita,” ministru ne’e sujere.

Timoroan na’in rua ne’e trasporta droga ho tipu éstaze (X-tasy) ba Indonézia no hetan apriensaun hosi Alfándega Indonézia iha fronteira Mota-Ain, Batugade, ho totál pílula (pil) 4874 subar iha mákina impresora ho tipu EPSON A4.

Jornalista: Florensio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here