Ministra Solidariedade Sosiál no Inkluzaun (MSSI), Armanda Berta dos Santos. Imagen Antonio Goncalves.

DILI, 3 jullu 2019 (TATOLI)—Ministériu Solidariedade Sosiál no Inkluzaun (MSSI) ezekuta ona orsamentu jerál Estadu (OJE) 2019 atinje ona pursentu 39.1.

Relatóriu ezekusaun orsamentu ne’ebé Agência Tatoli asesu liuhosi Portál Transparénsia Governu Timor-Leste haktuir ezekusaun OJE 2019 MSSI ho montante orijen tokon $56.505.642,00, kompromisu sira $8.418.068,16, obrigasaun sira $67.138,17, atuál $22.021.083,74, saldu $25.999.351,93 no ezekusaun %39.1.

“MSS oras ne’e dadaun ezekuta ona OJE 2019 atinje pursentu 39.1, maibé iha tempu badak sei halo pagamentu ba idozu sira. Institutu Solidariedade Sosiál ita seidauk halo transferénsia ninia orsamentu ba iha ne’ebá tanba ne’e iha tempu badak sei aselera entaun bele hasa’e ezekusaun ne’e aumenta maka’as liu-tan,” informa Ministra Solidariedade Sosiál no Inkluzaun, Armanda Berta dos Santos ba jornalista sira iha Palásiu Governu, ohin.

Nia esplika, sira ezekuta orsamentu la sees hosi item ne’ebé mak iha no mós ezekuta ba iha programa ne’ebé aprova iha Parlamentu Nasionál.

Tanba ne’e, governante ne’e promete katak OJE 2019 Ministériu Solidariedade Sosiál no Inkluzaun sei ezekuta ho di’ak iha tinan ida ne’e nia rohan.

Jornalista: Nelson de Sousa

Editór: Xisto Freitas

HAKEREK NO HATÁN

Please enter your comment!
Please enter your name here