Enkontru bilaterál entre VIII Governu Konstitusionál ho Parseiru Dezenvolvimentu sira iha sala konferénsia Institutu Estudu Diplomátiku, Ministériu Negósiu Estranjeiru no Kooperasaun (MNEK), Tersa (02/07/2019). Imajen/ Mídia MRLAP

DILI, 2 jullu 2019 (TATOLI)–Governu realiza enkontru bilaterál durante loron 2-3 jullu ho parseiru dezenvolvimentu sira, liuhosi Timor-Leste Development Partner Meeting (TLDPM) ho tema “Hakle’an Koordenasaun ba finansiamentu dezenvolvimentu”, hodi fahe informasaun konaba polítika Governu ba ajuda externu sira.

Reprezentante Governu, atuál Vise-Ministra Solidaridade Sosiál no Inkluzaun, Signi Candrawati Verdial hateten enkontru bilaterál ho doadór sira ne’e hodi asisténsia externa sira bele aliña ho prioridade VIII Governu Konstituional, tanba ne’e ohin governu fahe ona dokumentu ba parseiru dezenvolvimentu sira.

“Liuhosi apoiu sira ne’e, ita iha dokumentu Foreign Aid Policy hodi bele gia ita. Dokumentu ne’e aprova ona iha Konsellu Ministru hodi sai matadalan no hanesan polítika governu ba ajuda extenu, nune’e bele aliña ajuda sira ba Governu nia prioridade ba  tinan haat mai oin,” nia tenik ba jornalista sira iha salaun konferénsia Institutu Estudu Diplomátiku, Ministériu Negósiu Estranjeiru no Kooperasaun (MNEK), tersa (2/7).

Governante ne’e haktuir, bazeia ba informasain ne’ebé ohin (horsehik) Governu fahe ba parseiru dezenvolvimentu sira ko’alia ba sira, sei ajusta apoiu ba Governu hanesan apoiu ba orsamentu no tékniku liuhosi área prioridade ne’ebé Governu defini ona.

Parseiru dezenvolvimentu Governu Timor-Leste ne’ebé involve iha enkontru loron rua ne’e mak hanesan Brazíl, Nova Zelándia, Korea Súl, Indonézia, Austrália, Japaun, Portugál, Estadu Unidu Amérika, Banku Dezenvolvimentu Aziátiku (ADB-sigla inglés) no Koordenadór Rezidénsia Nasaun Unida.

Hafoin enkontru bilaterál, sei iha enkontru prinsipál TLDPM iha loron 4 jullu, ne’ebé sei loke ofisiálmente hosi Primeiru-Ministru, Taur Matan Ruak, iha salaun Auditóriu Ministériu Finansa.

Enkontru TLDPM realiza hodi halo diálogu nível aas no fatin koordenasaun entre Governu no parseiru dezenvolvimentu sira.

VIII Governu konstitusionál kontinua apoia diálogu polítiku refere no sei uza fórum ne’e ba realizasaun vizaun Timor-Leste nia prevista iha Planu Dezenvolvimentu Estratéjiku.

 Jornalista: Julia Chatarina

Editór: Xisto Freitas

Notísia relevante: http://www.tatoli.tl/2019/06/konsellu-ministru-aprova-rezolusaun-governu-ba-politika-asistensia-externa/

HAKEREK NO HATÁN

Please enter your comment!
Please enter your name here