Primeiru-Ministru, Taur Matan Ruak, prezide enkontru Konsellu Ministru iha Palásiu Governu, Kuarta, (03/07/2019). Imajen Egas Cristovão

DILI, 3 jullu 2019 (TATOLI) – Konsellu Ministru asiste aprezentasaun Banku Mundiál kona-ba estrutura parseria ba estratéjia dezenvolvimentu turizmu iha Timor-Leste.

Ministru Estadu Prezidénsia Konsellu Ministru no Ministru Turizmu ein ezersísiu, Hermenegildo Augusto Cabral Pereira haktuir, aprezentasaun husi Banku Mundiál ne’e importante kona-ba oinsá atu reforsa dezenvolvimentu turizmu iha ita-nia rai.

“Ema sira ne’ebé peritu iha setór ida turizmu husi Jakarta mai ko’alia ba Konsellu Ministru atu fó análiza komparativa kona-ba saida mak rai seluk halo ona hodi bele fó susesu ba dezenvolvimentu turizmu no potensialidade ne’ebé ita-nia rai iha atu dezenvolve turizmu didiak,” nia tenik ba jornalista sira iha Palásiu Governu, kuarta ne’e.

Tuir governante ne’e, turizmu hanesan setór ne’ebé ema hotu fiar katak potensialidade maka’as iha  no sei tulun liberta husi dependénsia total ba mina rai.

Hodi fó hanoin semana kotuk, Konsellu Ministru hatan hodi forma ekipa interministeriál ba dezenvolvimentu turizmu no komisaun ne’e sei tuur ho ekipa Banku Mundiál nian hodi kontinua diskusaun ne’ebé ohin aprezenta iha konsellu Ministru.

Entretantu, estratéjia dezenvolvimentu turizmu hatuur iha pasu prinsipál hanesan análize ba merkadu, estimativa ba kustu investimentu públiku no komparasaun entre kustu no benifísiu no kálkulu ba taxa no retornu.

Nune’e, atu alkansa meta husi turizmu nasionál, liuhosi planeamentu integradu ne’ebé sei identifika ba área prioritária sira no estratéjia husi turizmu liuhosi prosesu partisipativu, ne’ebé inklui estratéjia jestaun no prevensaun husi rekursu naturál no kulturál.

Alende ne’e, hasa’e profisionalizmu husi rekursu umanu, insentiva emprendedorizmu turíztiku, dezenvolve kompeténsia no promove kreximentu empreza ki’ik no média iha komunidade alvu sira, no dezenvolve infraestrutura destinu no produtu turístiku estratéjia sira, atu bele garante asesu ba fatin sira ne’e bazeia ba preukupasaun téknika sira, no mós preokupasaun kona-ba impaktu ambientál no sosiál sira.

Proposta ne’e sei kontinua analiza husi Komisaun Interministeriál ba dezenvolvimentu turizmu, responsável sira husi promosaun ba elaborasaun planu turizmu no analiza inisiativa lejislativa ne’ebé presiza no mós promosaun ba koordenasaun interdepartamentál iha implementasaun no ezekusaun Planu Turizmu.

Jornalista: Julia Chatarina

Editór.      : Rafy Belo

Notisia Relevante:

http://www.tatoli.tl/2019/06/governu-aprova-kriasaun-interministerial-dezenvolvimentu-turizmu/

HAKEREK NO HATÁN

Please enter your comment!
Please enter your name here