Saudozu Jaime Ribeiro “Samba-Sembilan” (liman loos hatais farda FALINTIL). Imajen espesiál

DILI, 2 jullu 2019 (TATOLI)—Komandante Samba-Sembilan. Ó ema ida brani, brani dunik. Biar lakon domin, lakon hamaus eh hakuak, la sente amizade família nian to’o mehi kaer rasik kuda talin, mehi ukun rasik ita rain. Bandeira fitun mean no kinur dada-sa’e, hafutar illas kalohan sai realidade dunik. Ó rasik, asiste. Ó liman etun, ó kosar sulin iha ó matan neon!

Komandante Samba-Sembilan. Ó Grande Eroi Timor-Lorosa’e nian. Fila hikas eh viajen ona ba Nai Nia kadunan lulik. Moris rohan laek nia hún. Lun-turu maka’as, Matan abu-abu nakaras. Haluru, lun-turu lelir.  

Ema wa’in tanis lun-turu lelir ba erói boot Saudozu Jaime “Samba-Sembilan” Ribeiro be hakotu iis iha Hospital Nacional Guido Valadares (HNGV), Dili, iha domingu (30 juñu 2019) kalan. Iha timoroan, poeta timoroan ida, Maeino Calado, dedika poezia [fraze balun] iha leten ho títulu “Adeus Grande Eroi Jaime Ribeiro “Samba-Sembilan” [hakerek iha Becora, Becusse Centro, 2 jullu 2019] tanba de’it funu no sira-na’in rua ninia fraternidade liu fali raan-nakait no husar-talin nabelit.

Tanba Samba-Sembilan ninia fraternidade ba ema hotu no ba rai-lulik Timor-Leste ne’ebé lori timoroan sira moris hamutuk sai hanesan raan-nakait no husar-talin nabelit hanesan maun-alin, halo ema hotu susar atu haluha ba ninia luta no ninia domin. Tanba ne’e, wainhira krize polítika militár  akontese iha 2006, Samba-Sembilan hato’o lia-tatoli ba ukun-na’in sira;

“Bainhira hatais farda no kaer kilat, tenke pás. Pás to’o rai ne’e nabeen. Dezde entrega responsabilidade ba señor (ukun-na’in sira) sira, ami ohin ba sivíl, podér iha ita-boot sira-nia liman, tenke halo pás.

Lorosa’e-loromonu hamutuk dezde antes, dezde Timor moris mai to’o estadu ne’e harii. Ohin iha 2006, signifika iha estadu no ema timoroan hamutuk mak funu hasoru Indonézia, agora pás. Signifika sira hamutuk nafatin no seidauk iha separasaun.”

Só, wainhira rona katak eroi boot Samba-Sembilan fila hikas ona ba Maromak nia kadunan, Komandu Luta, Kay Rala Xanana, ne’ebé [uluk] iha tempu funu moris seguru tanba hetan eskoltu hosi Samba,  hato’o sentidu kondolénsia ba saudozu Jaime Ribeiro ‘Samba-Sembilan’ liuhusi hakerek liafuan; “Ami sei hamutuk ho ó-nia família”.

Nune’e mós, Primeiru-Ministru, Taur Matan Ruak, hanesan veteranu no hanesan luta-na’in maluk, lahaluha hato’o sentidu kondolénsia ba família enlutadu.

Taur Matan Ruak hateten, “Ha’u-nia sentidu kondolénsia ne’ebé kle’an ba família saudozu nian ne’ebé triste hela tanba lakon ita-nia aswa’in ida ne’ebé iha tempu okupasaun barani tebes kaer kilat hodi reziste hasoru invazór sira, hodi ohin ita iha nasaun ida livre no independente.

Ita hotu reza ba Nai Maromak atu simu nia iha Nai Nia Reinu no husu atu nia klamar kontinua tau matan ba nia família no ita hotu hodi kontinua obra sira ne’ebé nia husik hela iha mundu. Nia mate nu’udar lakon ida ba estadu, ne’ebé iha tempu okupasaun fó vida tomak ba nasaun. Tanba ne’e, Estadu sei lahaluha iha Povu Timor-Leste nia fuan. Deskansa ho hakmatek iha Nai Nia Kadunan Santu. Adeus!”

Veteranu maluk seluk ne’ebé uluk sira luta hamutuk iha ailaran, ho neon no laran triste, hodi hato’o sira-nia kondolénsia ho espresaun domin ida ne’ebé ninin no rohan laek.

“Ha’u hateten hanesan ne’e ba Samba-Sembilan nia feen no nia oan sira. Bainhira ha’u sei moris, nia oan hanesan ha’u-nia oan. Ha’u sei ko’alia ho estadu Timor-Leste. Bainhira ha’u sei moris, nia oan hanesan ha’u-nia oan. Ha’u sei ko’alia ho estadu. Bainhira nia atu tau ba kaixaun, família sira tenke husu ha’u. Tanba ami na’in-rua nia kompromisu iha ai-laran todan tebes. Bainhira ha’u  sei moris, ha’u sei haree nia oan na’in-ualu ne’e,” dehan Komandante Lourenço José Cabral alias Aquito, ba Ajénsia TATOLI iha Ulmera, segunda (1/7/2019).

Maioria veteranu sira konsentra iha Suku Ulmera, Postu Bazartete, Munisípiu Liquiçá, hodi presta omenájen ikus ba saudozu Jaime Ribeiro “Samba Sembilan”. Sira lelir no tanis ho matan-ween tanba sira sente lakon belun luta-na’in ida ne’ebé barani no nia domin boot tebes ba rai lulik ida ne’e.

“Ami kuaze hosi veteranu territóriu tomak sente triste ho maun Samba-Sembilan nia mate. Nia ema ida ne’ebé barani tebes. Ha’u rona nia mate ha’u-nia matan-been monu,” Asistente Polítika Rejiaun III, Pasqual Ximenes Pereira alias “Nicson”, ba Ajência TATOLI, tersa (2/7/2019).

Ho onestu, Nicson haktuir, hosi parte loromonu nian, saudozu Samba-Sembilan mós la’ós ema ida kualkér iha prosesu luta ba libertasaun nasionál. Tanba ne’e, ba ukun-na’in sira, ba xefe estadu no xefe Governu, Nicson tatoli;

“Ha’u husu estadu ida ne’e tenke valoriza didi’ak veteranu sira, liliu hanesan Samba-Sembilan. Tanba maioria labarik [ninia oan] sira ne’e ki’ik hotu. Labele hanoin prosesu ida atu hakoi ne’e mak rebo-rebo mai vizita de’it. Se bele vizita nia família tenke kontinua. Samba-Sembilan hanesan veteranu ida ne’ebé dedika-aan ba luta naruk ida ne’e to’o Timor-Leste hadau ukun rasik-aan.”

Hanesan raan-nakait no haree malu hanesan maun-alin, iha fatin hanesan, José dos Santos Lemos alias “Komandante Labarik”, sente triste. Bainhira nia rona lia-rekadu katak Samba-Sembilan mate tiha ona, nia sente lalehan atu nakfakar tuun mai nia leten tanba nia belun-di’ak husik hela nia ba moris hakmatek iha mundu rohan laek nian.

Ho matan-ween, Komandante Labarik halerik. “Ami triste maibé Aman Maromak bolu ona nia. Uluk funu la mate, maibé destiñu ita labele espera. Ha’u husu ba estadu tau matan didi’ak ba veteranu sira. Tanba ita hotu hatene kondisaun veteranu sira oras ne’e laduun di’ak. Ami la ezije maibé se sente dehan ami mós fó kontribuisaun ba rai ida ne’e, bele tau matan ba oan ki’ak sira,’’ dehan Komandante Labarik.

Veteranu maluk, luta-na’in maluk, sira hotu husu ba estadu no Governu Timor-Leste atu tau matan lisuk ba saudozu Samba-Sembilan nia oan sira be saudozu husik hela. Hakarak ka lakohi, nune’e ka la nune’e, Governu Timor-Leste tenke fó valorizasaun ba veteranu sira. Tanba sira-nia dedikasaun ninin laek no rohan laek.

Razaun, wainhira husu ba poeta timoran, Maenio Calado, ne’ebé hakerek poezia “Adeus Grande Eroi Jaime Ribeiro “Samba-Sembilan” ba saudozu Samba, nia hatán, “Ha’u dedika poezia tanba memória ne’e importante liu no tanba saudozu Samba-Sembilan ninia sakrifísiu luta nian”. No, nia espresa ninia domin ba Samba-Sembilan hodi hakerek poezia hanesan fraze balun iha okos ne’e;

[………..]

Komandante SAMBA-SEMBILAN

Ó kumpri ona ó-nia devér

Ba ó-nia onra, ó-nia pátria

Ó la husik hela eransa mamuk

Ó mamorim ami, atu serbí ho kraik-án

Ó mamorim, labele kole atu sai ema di’ak

Ó mamorin atu labele baruk ko’alia lia-loos

Obrigadu Komandante, ba ó-nia sakrifísiu

Obrigadu Komandante ba ó-nia inspiradór

Obrigadu Komandante, tan ó-nia luta

Ami moris ho dignidade.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here