Ministru Estadu Prezidénsia Konsellu Ministru, Hermenegildo Augusto Cabral Pereira. Imajen Tatoli/Egas Cristóvão.

DILI, 3 jullu 2019 (TATOLI)–Ministru Estadu Prezidénsia Konsellu Ministru, Hermenegildo Augusto Cabral Pereira informa iha loron 8 jullu no posibilidade to’o loron 9 tinan ne’e, Governu sei realiza reuniaun extraordináriu Konsellu Ministru hodi diskute no aprova Pakote Diploma Lejizlativa Tratadu Fronteira Marítima (FM), molok lori ba Parlamentu Nasionál (PN) hodi hetan Ratifikasaun.

“Konsellu Ministru segunda loron 8 jullu, sei halo reuniaun extraordináriu ida, karik presiza sei halo to loron 9, atu aprova pakote diploma  lejizlativu nian. Hotu-hotu ne’ebé presiza atu bele halo ratifikasaun ba tratadu Tasi ho Austrália, tamba tratadu ne’e sei hetan ratifikasaun hosi Parlamentu Nasionál,” nia tenik ba jornalista sira iha Palásiu Governu, Dili, kuarta ne’e.

Governante ne’e informa, iha reuniaun extraordináriu ezekutivu sira sei marka prezensa inklui Xefe Negosiadór Prinsipál ba Delimitasaun Fronteira Marítima, kay Rala Xanana Gusmão, ne’ebé durante ne’e lidera prosesu ba Delimitasaun FM ho Austrália, hodi bele halo aprezentasaun.

“Bainhira Diploma ne’e barak, sei ba to’o tersa (9/7) hodi asegura katak ita ratifika tratadu ne’e hodi bele tama iha vigór, hahú ona nia validade implementasaun,” nia katak.

Agio dehan tan, nia parte nu’udar Ministru Estadu Prezidénsia Konsellu Munistru no Ministru Reforma Lejizlativa no Asuntu Parlamentár , Fiidelis Leite Magalhães, sei koordena ho PN hodi haree kalendáriu.

“Baibain 15 jullu ne’e membru PN féria ona, maibé sira atraza lai hodi konsidera diploma lejizlativa ne’ebé tenke aprova hodi hato’o ba Prezidente Repúblika hodi promulga no publika 30 agostu, ita halo ratifikasaun tratadu ho Austrália,” nia haklaken.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here