Xefe Bankada Partidu Demokrátiku, António da Conceicão. Imajen António Goncalves

DILI, 3 jullu 2019 (TATOLI)—Bankada Partidu Demokrátiku (PD) ezije VIII governu atu aprezenta lalais ona ezbosu lei Fronteira Marítima (FM) 5 mai Parlamentu Nasionál atu diskute hodi bele halo alterasaun tanba demora liu ona.

Prezidente Bankada PD, António da Conceição kontinua ko’alia asuntu ne’e tanba PD iha interese boot hakarak atu hatuur loloos Estadu Direitu liuhusi soberania nasaun ida ne’e nian.

Nia dehan governu tenki sukat tempu ne’ebé iha tanba Prezidente Repúblika rasik presiza loron 30 atu análiza hodi halo promulgasaun. Signifika, antes loron 25 fulan ne’e tenki aprezenta ona ba Xefe Estadu.

“Se governu hakarak ita hotu atu atinje 30 agostu nu’udar loron ida ne’ebé ita hotu konkorda ona atu halo rafikasaun ba tratadu FM ne’e, entaun tenke lalais ona aprezenta mai PN para bele halo diskusaun hodi altera tiha buat balun iha lei sira ne’e,” tenik nia iha Parlamentu Nasionál (PN), kuarta (03/07).

António esklarese plenária iha PN segunda no tersa de’it tanba ne’e labele hanoin deputadu sira atu mantein bebeik iha uma fukun ida ne’e. Tuir nia katak deputadu sira iha semana rua bele halo debate ho didi’ak.

“Pelumenus deputadu sira bele intende didi’ak ho lei ne’e. Labele foti de’it kartaun maibé lahatene implikasaun ka efeitu saida mak sei mosu iha futuru,” Conceição afirma.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here