Imblema saúde. Imajen Google

DILI, 2 jullu 2019 (TATOLI)—Sentru Saúde Becora rejistu moras oioin ho númeru ne’ebé aas hahú hosi janeiru to’o marsu tinan ne’e.

Xefe Sentru Saúde Becora interinu, Mateus de Jesus informa moras ne’ebé ho númeru aas mak moras ispa, kulit, diareia,pneodonia escabiosis, disentria no dengue sarampu.

“Hahú hosi janeiru to’o marsu tinan ida ne’e, moras ne’ebé númeru aas iha Sentru Saúde Becora mak moras selu-seluk ho númeru 78.632, moras ispa 9.195, moras kulit seluk 3.231, diareia 2.040, pneodonia 467, escabiosis 309, disentria 36, dengue 17, sarampu 1 no asidente tráfiku hamutuk 88,” Mateus ba Agência Tatoli iha nia kna’ar fatin, Becora, tersa ne’e.

Nia haktuir, dadus ba ema moras hahú hosi abríl nian seidauk bele fó sai tanba sentru refere seidauk akumula.

Mateus tenik, kada loron sira simu pasiente jerál hamutuk 220 no konsulta ba labarik sira kada loron hamutuk 49 no konsulta ba ema boot sira kada loron hamutuk ema na’in 58.

 “Aimoruk ne’ebé iha Sentru Saúde Becora sufisiente tebes ba pasiente sira no pesoál saúde (parteira) ne’e halo atendimentu ba saúde hamutuk 25, infermeiru iha 21 no médiku iha 26,” xefe ne’e informa.

Nia hatutan, iha fulan maiu, inan isin rua ne’ebé rejistu iha Sentru Saúde Becora hamutuk 842, maibé tama ba juñu seidauk iha dadus ba inan isin rua. Maski nune’e, tuir nia, atendimentu ba inan isin rua di’ak tebes.

Xefe Saúde ne’e hateten fasilidade (kareta) tula pasiente sira laduun funsiona di’ak, tanba ne’e dalaruma paradu no dalaruma hetan apoiu fali hosi Serbisu Saúde Munisipál Dili. Aleinde ne’e, kama ba pasiente sira nia kondisaun laduun di’ak. Problema ne’e, sira hato’o ona ba ministériu relevante maibé seidauk hataan difikuldade hirak ne’e.

Jornalista:  Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here