Diretór Verifikasaun no Lisensa LFA, José Carvalho (liman loos) no Prezidente Komérsiu no Venda LFA, Janio Tilman (liman karuk). Imajen Tatoli/Hortençio Sanchez

DILI 2 jullu 2019 (TATOLI)—Diretór Verifikasaun no Lisensa Liga Futeból Amadora (LFA), José Carvalho informa hahú 1 jullu, LFA loke ona rejistrasaun ba klube foun hirak ne’ebé hakarak partisipa iha jogu Terseira Divizaun no rejistrasaun sei ramata iha 20 jullu.

Diretór ne’e dehan, durante semana hira nia laran LFA fó ona oportunidade ba klube foun sira atu bele foti formuláriu iha edifísiu LFA nune’e bele hatene loloos dokumentu hirak ne’ebé tama iha kritéria rejistrasaun.

“Durante ne’e iha ona klube balun mai foti ona formuláriu no klube hirak ne’ebé rejistu ona mak hanesan FC Ermera City, ADN Maubisse no Dili United. Ami sei loke nafatin oportunidade atu hakat mai rejistu liliu munisípiu hirak ne’ebé to’o agora klube seidauk iha,” tenik José liu hosi konferénsia imprensa ne’ebé hala’o iha edifísiu LFA, Bairru Formosa, Dili, ohin.

Nia afirma tan, klube hosi munisípiu hirak ne’ebé foti ona formulariu maibé seidauk submete ba LFA hodi halo rejistrasaun mak hanesan reprezentante Oé-Cusse, Ataúro, Covalima no Bobonaro.

Entretantu, klube hirak ne’ebé tinan rua liu-ba partisipa ona iha jogu Terseira Divizaun maibé la konsege ultrapasa ba Segunda Divizaun hamutuk klube 8 mak hanesan FC Karau Fuik, FC Aimo, AS Lero, FC Liquiçá, Emanuel FC, FC Leopa, FC Tokodade no FC Matebian.

Maibé, klube hirak ne’ebé tuun hosi Segunda Divizaun mai Terseira Divizaun mak hanesan YMCA, CAFÉ, Benfica Dili no ADR União.

“Klube tuan sira ne’e nafatin iha direitu atu partisipa iha jogu Terseira Divizaun,” José esklarese.

Diretor ne’e esplika, kritéria ba klube hirak ne’ebé atu partisipa iha jogu Terseira Divizaun tenke kompleta dokumentu hanesan dokumentu hosi notariadu hanesan estatutu klube, jogadór mínimu 20, sertifikadu treinadór no osan montante $2.500.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here