Vise Prezidente Parlamentu Nasionál, Maria Angelina Sarmento. Imajen/Egas Cristovão

DILI, 02 jullu 2019 (TATOLI)–Parlamentu Nasionál (PN) sei halo alterasaun ba lei tributária, lei fundu petrolíferu, lei atividade petrolíferu, inklui lei rua ne’ebé liga ba tasa ho impostu.

Vise Prezidente Parlamentu Nasionál, Maria Angelina Sarmento, ba jornalista sira, ohin, iha PN, esplika katak, governu sei submete lei hamutuk lima mai parlamentu hodi halo alterasaun, bazeia ba evolusaun ne’ebé akontese iha Timor-Leste.

“Governu sei lori lei lima mai parlamentu hodi halo alterasaun, kompostu husi lei atividade petrolífera, lei fundu petrolíferu, lei tributária, inklui lei rua tan ne’ebé liga ba tasa ho impostu ba kompañia sira ne’ebé esplora mina iha area fronteira nian no mós tratadu fronteira marítima hodi ratifika,” tenik Deputada Maria Angelina Sarmento.

Nia dehan, fronteira marítima definidu ona, entaun kompañia sira ne’ebé halo esplorasaun ba mina, tenke submete ba lei, nune’e maka PN presiza ajusta lei tuir evolusaun ne’ebé akontese iha asuntu fronteira marítima nian.

Nia hatutan, iha periodu semana hirak nia laran, governu sei aprezenta lei sira ne’e ba parlamentu hodi halo alterasaun hafoin bele halo ratifikasaun ba akordu  delimitasaun fronteira marítima iha  loron 30 agostu, nu’udár loron istóriku ba Timor-Leste.

PN liuhusi Bankada AMP hamutuk ho Governu iha kompromisu boot hodi asina ona akordu tratadu delimitasaun fronteira marítima entre Timor-Leste ho Australia iha loron 6 Marsu 2018.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here