Saudozu Jaime Ribeiro "Samba Sembilan". Imajen/Mídia PR

DILI, 02 jullu 2019 (TATOLI) – Reprezentante povu iha Uma Fukun Parlamentu Nasionál (PN) fó votu pezár no presta omenajen ba Saudozu  Jaime Ribeiro “Samba Sembilan (9)” ne’ebé husik ona mundu ne’e, domingu kalan (30/06/2019).

Saudozu Samba Sembilan, altura sei foinsa’e nu’udar forsa FALINTIL iha ai-laran. Imajen/Espesiál

Vise Prezidente Parlamentu Nasionál, Maria Angelina Sarmento, ba jornalista sira, ohin, iha PN hateten,  PN fó votu pezár no presta omenajen ba saudozu Samba 9 tanba saudozu hanesan ema importante ida iha prosesu rezisténsia no veteranu ba kombatente libertasaun nasionál.

Atu lori saudozu Samba 9 mai PN, nia dehan, ida ne’e sei la halo tanba maioria presta omenajen ne’e ba deputadu sira, eis deputadu no eis membru governu sira ne’ebé hola parte iha órgaun soberania sira.

Deputada Maria Angelina Sarmento, hateten, votu pezár ne’ebé PN halo, ida ne’e hanesan solidariedade ida hodi hato’o ba família lutada, votu pezár ne’e sei publika iha Jornál Repúblika no Jornál PN, nune’e bele loke dalan atu fasilita família saudozu sira atu bele asesu ba rekursu Estadu, liuliu ba Saudozu nia oan sira.

Nia fó ezemplu; ba futuru sira nia oan hakarak hetan asesu ba bolsu estudu, sira bele kaer ida ne’e hanesan evidénsia atu Estadu rekoñese.

“Ita labele husik leet de’it sira nia jerasaun hodi la aproveita ukun-an ida ne’e, ita labele taka dalan ba sira atu asesu ba rekursu Estadu,” afirma Maria Angelina Sarmento.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here