Prevedora Direitu Ema-nian no Justisa, Jesuina Maria Ferreira Gomes. Imajen Egas Cristovão

DILI, 2 jullu 2019 (TATOLI)—Provedoria Direitu Umanu no Justisa (PDHJ-sigla portugés) relata ninian serbisu durante tinan 2018 ba Parlamentu Nasionál. Iha relatóriu ne’e, PDHJ rejista kazu hamutuk 203 ba kestaun boa governasaun nian.

Relatóriu ne’e hato’o hosi Provedora Direitu Umanus no Justisa, Jesuinha Maria Ferreira Gomes iha Parlamentu Nasionál, tersa ne’e.

Tuir direjente másima PDHJ ne’e katak kazu 203 ne’e kompostu hosi keixa 81 kona-ba violasaun direitu umanu no keixa 122 kona-ba governasaun di’ak. Númeru keixa barak liu mai Munisípiu Dili ho nian totál 138.

“Keixa sira tama ba iha PDHJ ne’e la’ós hotu-hotu atu sai kazu, maibé depende ba iha nia natureza no depende mós keixa sira ne’e tama ba iha mandatu ho kompetensia PDHJ nian ka lae,” Jesuinha esplika.

Nia informa, iha kazu 43 mak sira loke ba iha investigasaun. Kazu ne’e kona-ba violasaun direitu umanu nian iha na’in 23 no ligadu ba boa governasaun nian iha kazu 21.

Aleinde ne’e, nia informa, kazu hanesan iha delegasaun territoriál PDHJ rejista hosi Baucau hamutuk 23, Maliana 8, Same 14 no Rejiaun Administrativa  Espesiál Oé-Cusse Ambeno (RAEOA) iha keixa 20. Hosi totál keixa ne’e %55 ka %27 mai hosi feto.

Nia informa liu-tan PDHJ mós halo mediasaun no kosiliasaun. Kazu mediasaun iha tinan 2018 hamutuk 22. Kazu violasaun direitu umanu  iha11 no boa governasaun 11. Kazu medisaun no konsilasaun konsege finaliza ona 8 no 14 mak sei iha prosesu nia laran hela.

Jesuinha mós haktuir katak iha tinan 2018 iha relatóriu ba investigasaun fiskalizasaun ne’ebé PDHJ halo hamutuk 15. Ligadu ho violasaun direitu umanu iha 10 sanulu no boa governasaun 5. Nune’e mós, relatóriu ba isu temátiku ba fiskalizasaun nian hamutuk neen (6).

Nia salienta katak iha 2018 PDHJ hamosu mós rekomedasaun hamutuk 81 no maioria rekomendasaun sira ne’e hato’o ba iha Polísia Nasionál ho nia némeru rekomedasaun hamutuk 48.

PDHJ mós rejista kazu ne’ebé liga liu-ba iha kestaun liberdade, direitu, integridade no seguransa hamutuk 18, violasaun direitu ba ema moris hamutuk 3, violsaun hasoru feto 1, violasaun direitu asesu ba tribunál 1 no kazu ba indikasaun violasaun ba boa governasaun ba kategoria administrasaun nian hamutuk kazu 10, sees hosi podér kazu 9 no legalidade hamutuk 3.

Nia dehan PDHJ mós realiza programa reunifikasaun ba timoroan iha Indonézia ne’ebé haketak malu iha tempu funu hamutuk na’in 9 liuhosi serbisu ho sosiedade sivíl Komnas Ham iha Indonézia nune’e mai reuni fali ho nia família sira iha Timor.

Jesuinha afirma, atividade ne’e rasik PDHJ realiza ona ba dala lima. Totál númeru timoroan  ne’ebé PDJH lori mai hamutuk 63.

Iha relatóriu ne’e, nia dehan, relata mós katak durante tinan 2018, PDHJ realiza atividade ne’ebé fó formasaun ba membru PNTL sira no kria koopersaun ho ONG rai li’ur no rai laran hodi kapasita sidadaun sira ba sensibilizasaun direitu umanu sidadaun nian.

Tanba ne’e, dirijente másima PDHJ ne’e husu Parlamentu atu kotinua apoia atividade PDHJ nian hodi reforsa verba orsamentu iha 2019 nune’e bele aselera liu tan atividade PDHJ nian di’ak liu-tan.

Entretantu, prezidente bankada PUDD, António Benevides hateten nia parte apresia ba relatóriu ne’ebé PDHJ rasik hato’o ne’e, maibe nia husu ba oin PDHJ esforsu nafatin buat balun ne’ebé relasiona serbisu PDHJ nian.

Nune’e mós, deputadu hosi bankada UDT, Gilman Exposto tenik relatóriu ne’e di’ak no apresia tebes maibé presiza buka no hadi’a serbisu ne’ebé PDHJ halo hanesan ba oin buka halo mediasaun ba komunidade, fó asisténsia ba komunidade no tau konsiderasaun ba iha keixa sira.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here