Saudozu Samba-Sembilan (klaran) altura sei iha kampu batalla. Imajen espesiál

DILI, 1 jullu 2019 (TATOLI)—Luta nafatin ba ukun rasik-án! Loron ida, Manu-Aman sei kokorek iha Ramelau tutun. Sei iha lideransa ida ne’ebé sei hamriik  hodi hakilar ba mundu kona-ba ukun rasik-án ne’e.

Wainhira ha’u haree Saudozu Samba-Sembilan ninia lia rekadu sira ne’ebé tatoli tuir rede sosiál, ha’u neon kraik no ha’u matan-wen monu. Iha biban ha’u haree nia retratu sira, ha’u-nia laran tanis maibé hananu sentidu kondolénsia; “Hakmatek ho dame, aman funu-na’in FALINTIL durante tinan 24, saudozu Samba-Sembilan.”

Ha’u haree Samba-Sembilan nia retratu sira iha rede sosiál ha’u nia hanoin hikas fali ninia liafuan ne’ebé nia hateten mai ha’u. Ha’u hanoin fali múzika iñu FRETILIN “Foho Ramelau” ne’ebé poeta no saudozu Francisco Borja da Costa hakerek no Abílio de Araújo halo ba múzika ne’ebé to’o oras ne’e ninia rítmu no melódia sei la lakon. Ha’u hananu;

Eh! Foho Ranelau, Foho Ramelau, eh! Sá bé aas liu ó tutun, sá be bein liu ó lolon, eh! Tansá timur oan hakruuk beibeik! Tansá timoroan atan beibeik? Tansá timoroan ulun sudur uai-uain? Tansá timoroan ata uai-uain? Hadeer rau-hún mutin ona lá! Hadeer loron foun sa’e ona lá! …Hadeer kaer rasik kuda talin eh! Hadeer ukun rasik ita rain eh!

Ha’u koñese Samba-Sembilan liuhusi ha’u-nia hasoru malu ho nia liuhusi liafuan-lulik ida ne’ebé ida ha’u nunka haluha iha ha’u nia moris tomak mak liafuan lulik “Foho Ramelau”. Ha’u koñese no hasoru nia ba dahuluk iha tinan 1996. Momentu ne’e, ha’u sei estudante semestre III iha Fakuldade Siénsia Sosiál no Polítika (uluk Sospol) iha Universidade Timor-Timur (UNTIM). Ha’u hetan Samba-Sembilan hanesan estudante ida. Ha’u orgullu bele hasoru funu-na’in ida hodi hetan tan doutriña polítika no korajen hosi nia kona-ba luta ba ukun rasik-án.

Ha’u ho kolega Benjamin Braganca hasoru malu ho Saudozu Samba-Sembilan iha Postu Administrativu Remexio, Munisípiu Aileu, liuhusi Asistente Militár ida naran Maurakat ho nia soldadu Gastão alias Tigre (ema Aileu). Ami hasoru malu hodi hetan orientasaun kona-ba reziste funu no atu habelar rezisténsia klandestina ba parte loromonu hanesan; Suai, Bobonaro, no Ainaro. Ida ne’e atu reforsa tan klandestina parte loromonu liuhusi ami estudante sira ne’ebé hakarak tebes luta ba Timor nia ukun rasik-án.

“Liafuan ne’ebé Samba-Sembilan hateten mai ha’u mak; ‘Luta nafatin ba ukun rasik-án ba! Loron ida, Manu-Aman sei kokorek iha Ramelau tutun’.” Samba-Sembilan hanesan fó lembra fali mai ha’u, líder-boot nia hanorin ka doutriña sira nu’udar palavra órden. Signifika katak, funu bele naruk, timoroan bele mate mohu maibé sei iha lideransa ida ne’ebé sei hamriik iha Foho Ramelau nia tutun hodi hakilar ba mundu rai klaran kona-ba Timor-Leste ukun rasik-án ne’e.

Ih biban ne’e kedas ha’u bele katak Komandante Samba-Sembilan ninia karáter ne’e, hanesan líder ida ne’ebé umilde no moris ho simplisidade. Nia ema simples. Ho simples, nia organiza funu no orienta nia soldadu no komandante sira iha tempu funu. Ha’u sei lembra. Ema ne’ebé hamutuk ho nia mak Komandante Lourenço José Cabral alias Aquito (atual komandante Polísia Militár), Asistenti BERSAMA, soldadu MAUKRUBI, LESERUBI no PAULO (ha’u haluha ona nia kódigu) no asistenti Gastão alias TIGRE.

Maski nia líder ida simples no umilde maibé nia konsistente, firmi no abnegasaun iha orientasaun ko’alia ka orientasaun ruma. Ninia firmeza ne’e halo nia difísil atu muda nia desizaun ne’ebé nia desidi tiha ona. Samba-Sembilan, ema ida ne’ebé la eskola maibé ninia lideransa forte tebes. Nia lidera nia soldadu no klandestina sira iha orientasaun kualkér desizaun no ema influensia boot iha komandu FALINTIL. To’o iha tempu ida, komandu FALINTIL fó fiar ba nia mai iha Rejiaun IV Fronteira Súl, Odelgomo, hodi lidera akantonamentu FALINTIL prepara ba referendu ka konsulta populár iha 30 agostu 1999.

Maski tinan uituan ka badak de’it hamutuk Samba-Sembilan maibé nia konsege forma Rede Klandestina ka Kaixa Komandu Luta nian iha parte loromonu hanesan; Ainaro, Zumalai-Suai, Bobonaro, Dili, no fatin seluk tan. Kaixa ne’e Samba-Sembilan rasik maka harii no desidi nia naran KJLM (Komandu Joven Loromonu) ne’ebé lidera hosi MAURAKAT, Tuba Metin, Samurai, Tasafoma no Samba-9 mak sai protetór ka konsilleiru másimu ho Adjuntu Matos.

Saudozu Samba-Sembilan nia istória ba kontribuisaun forma klandestina kaixa militár Estadu Maiór das FALINTIL (RMF) Komando da Luta parte loromonu ho nia baze ka abrigu iha Covalima, Zumalai-Lour, Naguidal ho Dato Tolu hanesan ramu alastra ka expansa tan ba Bobonaro, Ainaro, Dili, no sai seleiru ba fornesimentu hahán ba rejiaun tomak. Iha kaixa ne’e, Samba-Sembilan simu orientasaun diretamente hosi Taur Matan Ruak ne’ebé altura ne’ebá sai hanesan Xefe Estadu Maiór FALINTIL ho Adjuntu Alin Laek.

Iha últimu reziste funu hasoru invazór iha tinan 1999, fatin lojístika iha Xina Rate, Dili, ne’ebé ninia responsável mak tiu Moises. Iha Bobonaro-Odelgomo, Samba-Sembilan mak lidera Fronteira Súl hodi fó seguransa ba povu ne’ebé la eksodus (la refujia) ba ai-laran, hanesan povu hosi fatin seluk mai iha Odelgomo no Foho Lour iha Bobonaro.

Saudozu Samba-Sembilan mós kaer komandu nu’udar orientadór funu iha Bobonaro ba Komandu FALINTIL Rejiaun IV iha Fronteira Súl. Samba-Sembilan sai salvaguarda ba povu Timor-Leste iha momentu 1999, wainhira Bobonaro rebenta (rahun) ataka hosi milísia pro-integrasaun ho TNI (Tentara Nasional Indonesia).

Veteranu tinan 24 iha ai-laran, Samba-Sembilan, la kaer nia kilat maibé kaer samurai ida mak manda nia soladu sira trava milísia no TNI sira iha sira-nia brutalidade iha Bobonaro. Iha altura ne’ebá, Samba-Sembilan kaer de’it surik ho HT (Hand Talk)  ka aparellu ida ne’ebé babain bolu “Angola Ida” hodi manda nia soldadu sira iha biban ne’ebá. Tanba ne’e, ha’u konsidera Samba-Sembilan hanesan ema ne’ebé aten brani, korajen no prinsípiu luta nian be metin no hadomi tebes ninia povu.

Ha’u koñese nia tinan la barak maibé Samba-Sembilan nu’udar líder ida ne’ebé umilde, simples, onestu no abnegasaun tebes iha ai-laran to’o ukun rasik-án, to’o nia iis kotu iha mundu rai klaran iha domingu (30 juñu 2019). Ba ha’u, Samba-Sembilan sai aman ida ezemplár tebes ba jerasaun foun sira. Maski la matenek maibé ninia luta no domin ba rai Timor-Leste, jerasaun foun sira tenke no presiza moris banati.

Ha’u hein katak, hanesan liafuan lulik ida ne’ebé nia hateten hela ba ha’u iha tinan 1999 katak “Luta nafatin ba ukun rasik-án! Loron ida, Manu-Aman sei kokorek iha Ramelau tutun”, oras ne’e, ninia klamar mós hamriik ona iha Foho Ramelau nia tutun ne’ebá, hodi haklaken ba ema hotu katak moris ida-nia kmanek mak luta ba ema seluk nia di’ak no luta ba mate ida-nia rohan mak moris ida rohan laek.

Tanba nia [Samba-Sembilan] klamar hamriik ona iha Foho Ramelau nia tutun mesa-mesak, mak rai-lulik Timor-Leste ne’e mós tanis hanoin/ Foho Matebian-Kablaki-Matebian mós tanis ba nia. Balada liras no liras laek sira halerik ba nia mate. Fatuk no ai sira mós hananu hodi sura ninia luta la hotu rai. Tasi no lalehan mós tanis, hodi fakar nia mata-ween habokon Timor-Leste hosi dadeer to’o lorokraik (abu-abu falun-metin Sidade Dili no Timor-Leste tomak). Timor-Leste tanis. Timor-Leste tutur lutu-metan hodi tanis no tanis. Adeus Saudozu Samba-Sembilan!

(Nota; Artigu ne’e hakerek bazeia ba entrevista ne’ebé jornalista Agência TATOLI hala’o ho Sasin-Na’in, Domingos Braganca (Moris iha 2 fevereiru 1975), atuál Ofisiál Planeamentu Lokál iha Ministériu Estatal iha Postu Administrativu Zumalai,  Munisípiu Covalima, liuhusi rede sosiál, 1 jullu 2019).

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here