Asistente Polítika Rejiaun III, Pasqual Ximenes Pereira alias Nicson

LIQUIÇÁ, 2 jullu 2019 (TATOLI)—Maioria veteranu konsentra iha Suku Ulmera, Postu Bazartete, Munisípiu Liquiçá, hodi presta omenájen ikus ba Saudozu Jaime Ribeiro alias Samba-Sembilan (9) ne’ebé hakotu iis iha loron domingu (30/6).

“Ami kuaze veteranu territóriu tomak sente triste ho maun Samba-Sembilan nia mate. Nia ema ida ne’ebé barani tebes. Ha’u rona nia mate ha’u-nia matan-been monu,” Asistente Polítika Rejiaun III, Pasqual Ximenes Pereira alias Nicson, ba Agência TATOLI, iha saudozu nia hela fatin, Suku Ulmera, Postu Bazartete, Munisípiu Liquiçá, ohin.

Nia hatutan, hosi parte loromonu nian Samba-Sembilan mós la’ós ema ida kualkér iha prosesu luta nian.

“Ha’u husu estadu ida ne’e tenke valoriza didi’ak veteranu sira, liliu hanesan Samba-Sembilan, tanba maioria labarik sira ne’e ki’ik hotu. Labele hanoin prosesu ida atu hakoi ne’e mak rebo-rebo mai vizita. Se bele vizita ba nia família tenke kontinua,” Nicson sujere.

Nia hatutan, Samba-Sembilan hanesan veteranu ida ne’ebé dedika-aan ba luta naruk ida ne’e to’o ramata.

Iha fatin hanesan, José dos Santos Lemos alias Komandante Labarik, sente triste bainhira rona informasaun katak Samba–Sembilan hakotu iis ona.

“Ami triste, maibé aman Maromak bolu ona. Uluk funu la mate, maibé destiñu ita labele espera. Ha’u husu estadu atu tau-matan didi’ak ba veteranu sira, tanba ita hotu hatene kondisaun veteranu oras ne’e laduun di’ak. Ami la ezije, maibé se sente dehan ami mós fó kontribuisaun ba rai ida ne’e, bele tau-matan ba oan ki’ak sira,” Komandante Labarik haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here