Diretór Finansas Polisia Nasional Timor Leste (PNTL), Superintendente Asistente, Basilio de Jesus. Imajen/Eugénio Pereira

DILI, 02 jullu 2019 (TATATOLI)-Komandu Polisia Nasionál Timor-Leste  (PNTL) prepara hela  programa prioridade lima (5) iha proposta  Orsamentu Jerál Estadu (OJE) 2020.

Programa prioridade hirak ne’e mak hanesan, moderniza estrutura komandu PNTL husi nasionál too baze, reforsa Servisu Seguransa Orden Públika ba iha munisípiu 13 ho unidade no departamentu, reforsa servisu Unidade Polisia Marítima, rekrutamentu no formasaun ba membru PNTL iha rai laran no rai li’ur  no programa ikus mak iha 2020 komesa implementa polítika 1325 kona-ba Polisia Feminina hodi ko’alia kona-ba jéneru.

“Programa prioridade lima ne’e maka sai prioridade komandu nian iha 2020,” informa Diretór Finansas Polisia Nasional Timor Leste (PNTL), Superintendente Asistente, Basilio de Jesus, ba jornalista, ohin, iha Kuartél Jerál PNTL, Caicoli, Dili,  iha ámbitu sorumutuk Komandu PNTL nasionál ho munisípiu, inklui administrasaun PNTL hodi preparasaun Planu Asaun Anuál (PAA) no Submisaun Orsamentu Jerál Estadu (OJE) 2020.

Basilio esplika, husi programa lima iha leten, Komandu PNTL halo fila fali ba sub-programa maka iha diskusaun hodi koloka orsamentu ba programa prioridade lima ne’e tuir polítika VIII Governu Konstitusionál.

Haree fila fali ba Orsamentu Jerál Estadu (OJE) 2020, Basilio hatutan, PNTL mós iha planu prioridade  10, hanesan; haree ba  Servisu Komandu Administrasaun, Unidade Espesiál Polisia (UEP), Komandu Operasionál, Unidade Polisia Fronteira (UPF), Unidade Polisia Marítima (UPM),  Komandu  Polisia Rejiaun I, Rejiaun II, Rejiaun III no Sentru Formasaun Akadémiku.

Komandu PNTL husu atu komandante PNTL no administrasaun finansas bele halo preparasaun orsamentu ho feitu para bele aprezenta ba Komandu PNTL hodi hato’o ba Ministériu Interior.

Ba tinan 2020 too 2023, PNTL sei kontinua halo rekrutamentu ba membru ajente polisia foun hodi kompleta númeru PNTL ne’ebé agora iha hamutuk 4,171.

“Hahú 2020 too 2013 kada tinan ita hakarak rekruta membru 250, ida ne’e hanesan proposta ida hato’o ba governu,” Basilio esplika.

Kona-ba totál OJE Komandu PNTL ba 2020, Diretór Finansas Basilio, seidauk bele fó sai, tanba sei iha faze diskusaun no ajustamentu.

Sorumutuk  ne’ebé lidera husi Komandante Jerál PNTL, Komisáriu Faustino da Costa no Segundu Komandante Jerál, Komisáriu Mateus Fernandes ne’e, partisipa husi Komandante Munisípiu, Komandante Unidade, Xefe Departamentu no pontu fokál, hodi   halo diskusaun no aprezenta sira idak-idak nia planu ho programa.

Jornalista                  : Eugénio Pereira

Editór                        : Francisco Simões

HAKEREK NO HATÁN

Please enter your comment!
Please enter your name here