DILI, 1 Jullu 2019 (TATOLI) –Governu da-ualu Timor-Leste dezafia ekipa Lighthouse relasiona ho prosesu legal hosi Lighthouse kontra Governu Timor-Leste (TL) ne’ebé hahú fali ona iha Tribunál Supremu Vitória. Enkuantu, ekipa ne’ebé uluk defende LightHouse iha International For Settlement of Investment Disputes (ICSID) ne’e lakohi kontinua ona.

Ministru Estadu Prezidénsia Konsellu Ministru, Hermenegildo Augusto Cabral Pereira, ho fiar an deklara, Governu ho konviksaun katak sei manan kazu hasoru kompañia Light House iha Tribunal no agora husu rekursu kontra desizaun primeira instánsia, tanba juis nia interpretasaun ba jurisdisaun.

“Ita nia ekipa dezkorda kompletamente para aplika Lei Commonwealth Australia iha kompeténsia jurisdisaun”, Agio Pereira esplika ba deputadu sira iha biban debate ho Primeiru-Ministru, iha sesaun plenária segunda ne’e.

Agio fó hatene, iha loron 9 Agostu 2019, sei rekorre ba Tribunal Australianu hodi husu rekursu no bainhira la konsege manan iha sistema jurídiku Austrália, sei ba fali última instánsia (The High Court of Austrália), ne’ebé bele Juis hitu to’o lima mak halo julgamentu.

Bainhira Governu lakon iha prosesu última instánsia, tenke tama prosesu ne’ebé mak bolu evidénsia aprezentada, no bainhira lakon tan sei demora tempu (tinan rua ka tolu) tanba kazu no evidénsia barak, enkuantu ekipa parte rua argumenta, hafoin Juis sira rona hotu sei lori tempu tanba sei avalia evidénsia.

“Sira nia (light house) evidénsia ladún forte no ita nia argumentu sentrál katak laiha kontratu selebradu entre Governu Timor-Leste no Lighthouse Corporation, satan kontratu para investimentu no Lighthouse tenke prova katak nia prejudikadu,” Agio fó sai ho fiar an hodi hatán ba akuzasaun Lighthouse iha Tribunal Supremu Vitória katak Governu Timor-Leste la-kumpre devér hanesan iha kontratu.

“Agora Lighthouse hahú kazu ne’e iha Tribunal Supremu Vitória. Iha dokumentu asinadu la-halo referénsia Tribunal Supremu, maibé mosu fali husi dokumentu ida sira bolu dehan connected document mak halo referénsia. Ita nia ekipa iha dúvida kontra validade dokumentu ne’e, tanba ne’e ita sei kontra validade dokumentu ne’e iha Tribunal Vitória.”

TL Vs Light House

Disputa ne’e hahú husi kontratu entre Governu Timor-Leste ho Lighthouse iha loron 22 Outubru 2010, ba fornesimentu kombustivel ba jeradór ualu iha Sentrál Elétrika Comoro.

Arbitrajen inisia husi Lighthouse kontra Governu Timor-Leste iha loron 14 Janeiru 2015, hodi fó razaun disputa iha akordu fornesimentu kombustivel entre Timor-Leste no Lighthouse.

Lighthouse sente prejudikadu tanba Governu Timor hapara kontratu, enkuantu Governu konsidera Lighthouse la-mai halo investimentu maibé hanesan ‘broker’ ba kompañia tanba laiha sertifikadu investimentu, durante ne’e oferese de’it Bussiness Service.

Tribunál Arbitrajen ne’ebé involve iha prosesu, kompostu husi árbitru internasionál tolu hanesan Stephen Jagusch nomeadu husi Lighthouse, Professor Campbell McLachlan nomeadu husi Timor-Leste no Prezidente Tribunál Profesora Gabrielle Kaufmann-Kohler nomeadu husi ko-árbitru sira.

Ikus mai Tribunál deside katak laiha jurisdisaun ba disputa ne’e no rejeita pedidu apoiu husi Lighthouse ne’ebé refere ba pagamentu kustu arbitrajen ho montante $273.434,26 ba Timor-Leste no seluk tan millaun $1,3 ba kustu despeza legál kontra Timor-Leste.

Foin lais, Lighthouse hahú fali prosesu judisiál kontra Governu Timor-Leste iha Tribunal Supremu Vitória.

Jornalista: Julia Chatarina

Editór : Rafael Belo

HAKEREK NO HATÁN

Please enter your comment!
Please enter your name here