Saudozu Samba 9. Imajen Mídia PR

LIQUIÇÁ, 2 jullu 2019 (TATOLI)—Prosesu funerál ba Saudozu Jaime Ribeiro alias Samba-Sembilan (9) sei hein Prezidente Repúblika (PR), Francisco Guterres Lú Olo fila hikas hosi tratamentu saúde iha Malázia.

Tuir informasaun ne’ebé fó sai antes ne’e katak sei haloot iha loron sesta (5/7), maibé adia ba loron sábadu (6/7), tanba Prezidente Repúblika, Francisco Guterres Lú Olo to’o iha sesta ne’e tuku 03.00 otl.

Reprezentante Komisaun Instaladora Veteranu Munisípiu Liquiçá, César dos Santos da Silva ‘Merak’ esplika, preparasaun ba prosesu fúnebre tuir desizaun ne’ebé mak hosi família, liliu oan ki’ak atu lori ba haloot iha Jardim dos Herois Metinaro, tanba tuir lei hakarak ka lakohi veteranu dezmobilizadu sira tenke ba iha jardin refere.

“Tuir programa sei haloot iha sesta, maibé ohin Xefe Kaza Militár Prezidénsia Repúblika telefone mai ami atu muda uituan programa ba fali sábadu, ho razaun katak sesta lorokraik Prezidente Repúblika to’o mai, tanba Prezidente Repúblika mak sei prezidi serimónia ne’e iha Metinaro. Tanba ne’e mak Xefe Kaza Militár haruka muda ba sábadu,” Merak ba Agência TATOLI, iha Suku Ulmera, Postu Bazartete, Munisípiu Liquiçá, ohin.

Tuir nia, saudozu Samba-Sembilan nian mate-isin sai hosi uma Ulmera ba misa iha Igreja Katedrál no ikus liu direta ba fatin ikus iha Jardim dos Herois Metinaro.

“Laiha tan vizita ba fatin seluk. Sai hosi uma diretamente ba iha Katedrál hosi Katedrál ba liu Metinaro,” dehan Merak.

Merak husu ba família tomak, kolega, kompañeiru luta tomak, sesta kalan hadeer no sábadu akompaña saudozu ba haloot iha fatin ikus.

Veteranu hosi Munisípiu Liquiçá ne’e dehan tán, forsa sira sei hala’o funerál arma no tiru ba leten iha Jardim dos Herois Metinaro.

Tuir observasaun Agência Tatoli, Prezidente Parlamentu Nasionál, Arão Noé de Jesus Amaral, Sekretáriu Estadu Polítika Formasaun Profisionál, Julião da Silva, Prezidente Komisaun Omenájen, Virgílio Smith no reprezentante instituisaun estadu tomak to’o oras ne’e hato’o ona sentidu kondolénsia ba saudozu Samba-Sembilan.

Tuir informasaun ikus ne’ebé Agência Tatoli simu iha kalan ne’e katak molok lori ba Katedrál, sei liuhusi sede Komité Sentrál FRETILIN (CCF-sigla portugés) hodi presta omanájen ikus ba saudozu nia mate-isin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here