Vice Xefe Bankada FRETIlIN, Francisco Miranda Branco. Imajen/Egas Cristovão

 DILI, 2 de jullu 2019 (TATOLI)—Bankada Opozisaun FRETILIN iha Parlamentu Nasionál to’o agora hein nafatin posibilidade VIII Governu Konstitusionál atu distribui dokumentu Fronteira Marítima (FM) ba sira molok loron 8 jullu 2019.

FRETILIN konsidera kalendáriu governu nian marka ona ba loron 8 jullu 2019 mak foin halo apresiasaun dokumentu Fronteira Marítima iha nível Konsellu Ministru ne’e tarde ona.

“Ami lakohi tempu atu to’o ona mak foin distribui depois obriga ami deputadu sira tenki yess man de’it. Ne’e ami lakohi!,” tenik vise Prezidente Bankada Opozisaun FRETILIN, Francisco Miranda Branco iha Parlamentu Nasionál (PN), tersa ne’e.

Nia dehan, tuir loloos, proposta lei 12 kona-ba FM nian ne’e governu aprezenta ona mai PN para bele distribui ba deputadu sira atu estuda no apresia depois bele aprova ho konsiénsia no responsabilidade maibé to’o agora seidauk akontese.

“Agora preokupasaun FRETILIN nian tuir bankada katak tempu badak ona oinsá mak ami bele estuda atu bele apresia. Tanba buat sira ne’e iha ligasaun ho estadu no povu-nia moris. Maibé, ezijénsia sira ne’e atu hateten de’it katak FRETILIN iha duni interese ba estadu no povu nasaun ida ne’e nian tanba hakarak garante duni futuru ida di’ak ba jerasaun sira,” katak Branco.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here