Movimentu Okupasaun Kontra Tasi Timor ka’er hela panfleitu Advogadu Bernard Collaery, iha edifísiu Asosiasaun HAK, Faról-Dili, ohin. ImajenTatoli/Florensio Miranda Ximenes

DILI, 2 jullu 2019 (TATOLI)—Movimentu Kontra Okupasaun Tasi Timor (MOKTT) husu Estadu Timor-Leste no Oitavu Governu Konstitusional liuhosi Primeiru-Ministru, Taur Matan Ruak, atu hato’o povu Timor-Leste nia solidaridade ba belun-boot Bernard Collaery ho Witness K ne’ebé hasoru hela prosesu judisiáriu no ameasa tama komarka iha Austrália tanba ko’alia lia loos.

Liuhusi konferénsia imprensa ne’ebé hala’o iha edifísiu Asosiasaun HAK, Farol-Dili, ohin, portavóz MOKTT, Moises Soares Magno, dehan Bernard Collaery hanesan advogadu Australianu ida, ne’ebé uluk fó kontribuisaun maka’as ba povu Timor-Leste (TL) nia luta ba ulun rasik-aan.

Hafoin ukun rasik-aan, nia haktuir, Bernard Collaery hola parte iha ekipa advogadu internasionál ne’ebé reperezenta Timor-Leste iha kazu disputa balun hasoru governu Austrália iha Tribunál Intenasionál.

Tuir Moises, Bernard Collaery nia kliente ida naran Witness K mak ko’alia sai lia loos kona-ba atividade espionázen hosi Governu Austrália hasoru ekipa negosiadór Timor-Leste sira durante negosiasaun ba tratadu Certain Maritime Arrangements in the Timor Sea (CMATS iha tinan 2004.

Portavóz ne’e dehan lia loos ida ne’e Governu TL kaer nu’udar evidénsia hodi obriga Governu Austrália ba tuur iha meza atu negósia kona-ba fronteira marítima.

“Bernard Collaery ninia kontribuisaun ba tratadu fronteira marítima ne’ebé Timor-Leste ho Austrália atu ratifika iha loron 30 agustu mai ne’e boot teb-tebes,” tenik Moises.

Tanba ne’e, nia dehan, Estadu Timor-Leste no povu Timor-Leste tenke halo buat ruma atu labele husik Bernard Collaery tama kadeia tanba de’it nia ko’alia lia loos atu defende Timor-Leste nia direitu tuir lei internasionál.

Jornalista: Florensio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here