Vendedór balun fa’an ikan iha tortuáriu leten. Imajen Agência Tatoli/Nelia Fernandes

DILI, 2 jullu 2019 (TATOLI)—Vise Prezidente Autoridade Munisipál Dili, José Filipe Ximenes Smith  hateten, lei Kódigu Estrada  númeru 33/2008 bandu ema sé de’it mak fa’an sasán iha dalan públiku hanesan iha tortuáriu leten.

“Lei ne’e sei fó sansaun ne’ebé maka’as tebes atu aplika ba ema sira ne’e,” Jose Filipe ba Agência Tatoli iha nia kna’ar fatin, Autoridade Munisipál Dili, ohin.

Nia haktuir loron hirak liu-ba Autoridade Munisipál Dili fó hanoin ona ba vendedór sira nune’e sira bele kumpri lei refere no karik liu tiha semana mak la kumpri nafatin, Ekipa Operasionál hosi Autoridade Munisipál Dili sei atua no sita sasán sira ne’ebé vendedór sira fa’an iha espasu públiku.

Iha sorin seluk, vendedór Manuel Barbosa hateten, dezde uluk kedas governu liuhusi Autoridade Munisipál Dili duni sira ba mai no haruka sira ba Taibessi maibé sira senti laduun seguru tanba governu la kria fatin fa’an ikan ba sira.

Iha parte seluk, vendedora Maria Graciana informa maski governu liuhosi Autoridade Munisipál Dili mai duni nia, maibé depois liu loron ida ka rua nia mai fa’an nafatin tanba iha fatin ne’e ema sempre hola no nia desidi fa’an iha fatin refere (espasu públiku) tanba governu seidauk kria kondisaun ba sira atu sira bele fa’an sasán ho dignu.

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here