Primeiru-Ministru, Taur Matan Ruak, hetan vizita kortézia hosi Sósiu PNUD/UNDP, Paula Teixeira da Cruz, iha Pálasiu Governu, Dili, tersa (02/07/2019). Imajen Tatoli/Egas Cristóvão

DILI, 2 jullu 2019 (TATOLI)–Agora dadauk, Governu ho Parlamentu Nasionál (PN) iha faze atu Reforma Judisiál no Reforma lejizlativa, tanba ne’e iha biban vizita Delegasaun Programa Nasaun Unida ba Dezenvolvimentu (PNUD/UNDP), Primeiru-Ministru (PM), Taur Matan Ruak troka ideia kona-ba asuntu judisiál.

Sósiu PNUD, Paula Texeira da Cruz haktuir, enkontru ho Xefe Estadu pozitivu tebes hodi fó kontributu ba setór judisiál.

“Ami mai ho ekipa PNUD aprezenta ami-nia kontributu ba Reforma Sistema Justisa iha Timor-Leste. Iha medida ne’e, Primeiru-Ministru simu no troka ideia ho ami no iha oportunidade para espor liña husi forma hotu hanesan kontatu reuniaun ne’ebé ami hala’o ona ho entidade oioin husi setór justisa,” nia tenik ba jornalista sira iha Palásiu Governu, tersa ne’e.

Tuir nia, sistema judisiál iha Timor-Leste tenke adapta ho realidade Timor-Leste, labele kópia sein haree ba realidade nasaun no povu nian.

“Naturalmente projetu sira mak ami troka ideia hanesan projetu obrigatóriamente ne’ebé mak adapta ho realidade Timor-Leste, hanesan uzu ba Konstituisaun no Lei,” nia esplika.

Paula haktuir, PM kontente bele haree konjuntu ba sira ne’ebé integra iha sistema judisiál, enkuantu timoroan barak mak hein lei estruturál.

“Iha timoroan barak mak hein hela lei estruturál. Ita labele haluha katak Timor-Leste sei uza lei UNTAET, lei indonézia balun no diploma pós independénsia.Tanba ne’e, dala barak permiti sistema ida ne’ebé injirida,” nia subliña.

 Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here