Advogadu Pedro Aparicio Guterres. Egas/EgasCristovão

DILI, 02 jullu 2019 (TATOLI) – Eis Prezidente Asosisiaun Advogadu Konsultaria Timor-Leste (ACTL-sigla portugés), Pedro Apariçio Guterres, hateten, advogadu timoroan prontu atu kontribui ideia ba kazu kazál timoroan lori droga.

 Pedro Apariçio hateten, to’o ohin loronsira seidauk simu informasaun husi Governu ou konvite ruma husi Governu ba advogadu Timoroan para husu opiniaun kona-ba papél saida mak advogadu Timoroan sira bele hato’o ba kazu kazál timoroan ne’ebé iha hela detensaun autoridade Indonézia nian tanba lori droga atu ba fa’an iha Provínsia Kupang, Timor Osidentál (NTT-sigla indonézia).

“Ami seidauk iha konvite ruma atu fó opiniaun ba Governu Timor-Leste atu oinsa mak kontribui ba malu hodi buka dalan ba kazál timoroan ne’ebé detein hela iha autoridade Indonézia sira,” informa Pedro Apariçio, ohin, iha Tribunal Distritál Dili (TDD).

Nia esplika, kazál ne’e hetan pena morte iha Indonézia, maka estadu Timor-Leste iha obrigasaun moral liuhusi konstituisaun artigu 29 atu asegura sidadaun nia direitu iha nasaun seluk.

“Ami advogadu mós prontu atu ajuda kazál timoroan ne’e, maibé inisiativa tenke husi estadu no governu atu bele komunika ba malu,” hateten Advogadu Pedro Apariçio.

Nia dehan, Timor-Leste la adopta pena de morte no bainhira ema seluk ka nasaun ka estadu seluk mak hasai timoroan nia vida, ne’e labele akontese.

Hatán kona-ba akordu estradisaun entre TL ho RI, nia dehan, durante ne’e laiha akordu estradisaun entre  rai rua. Maibé, ba prosesu ida ne’e, estadu mak tenke servisu makas atu bele lori fila kazál timoroan mai Timor-Leste.

Kona-ba posibilidade bele salva kazál timoroan ne’e, nia parte lakohi komenta, tanba buat hotu iha hela faze inkéritu.

“Ita nia preokupasaun mak labele hetan pena morte,”  hateten Pedro Apariçio.

Husi sorin seluk, Ministru Justisa Manuel Cárceres da Costa hatete, Governu Timor-Leste labele halo buat ida, se enkuantu seidauk loke dalan, maibé dalan ne’ebé mak halo iha Indonézia maka diplomasia.

“Ha’u fiar katak ita nia Embaixadór iha Jakarta, Alberto X.P. Carlos,  halo hela, ne’ebé ha’u koñese didi’ak embaixadór ne’e,”  hateten Ministru Manuel Cárceres da Costa.

Ministru Justisa esplika TL too oras ne’e seidauk iha akordu estradisaun ho Indonézia, Australia, Portugal. Tamba ne’e, iha futuru mak hanoin kona-ba akordu estradisaun rai rua ne’e, tenke konkorda malu.

“Se ita mak hakarak karik, Indonézia lakohi, Timor-Leste labele halo buat ida, tanba buat ida akordu rai rua tenke simu malu,”  tenik Ministru Manuel Cárceres.

Jornalista        : Domingos Piedade

Editór              : Francisco Simões

 

 

HAKEREK NO HATÁN

Please enter your comment!
Please enter your name here