Prezidente FC Porto Taibessi, Agustinho Nunes

DILI, 2 jullu 2019 (TATOLI)—Aban (3/7), jogu kontinuasaun Tasa 12 de Novembro ne’ebé sei hasoru malu entre ekipa rua hanesan Porto Taibessi no Atlético Ultramar iha Estádiu Munisipál Dili.

Prezidente FC Porto Taibessi, Agustinho Nunes hateten maski Porto Taibessi la fásil hasoru Ultramar hanesan ekipa Primeira Divizaun kompara ho sira ne’ebé hamahon-án iha Segunda Divizaun.

Maski ho jogadór lokál de’it, Agustinho dehan, sira sei hatudu performa di’ak hodi hasoru ekipa ne’ebé reforsa hosi jogadór estranjeiru ne’ebé kualidade di’ak.

Kapitaun Ultramar, Glaco Trajano

“Aban ami sei hatudu performa ne’ebé di’ak hasoru Ultramar. Biar sira ekipa forte iha Primeira Divizaun maibé ami sei uza kapasidade jogu ne’ebé iha ona hodi hasoru sira,” tenik Agustinho liuhosi konferénsia imprensa ne’ebé hala’o iha edifísiu Liga Futeból Amadora (LFA), Bairru Formosa, ohin.

Nia informa, formatu Porto Taibessi ba jogu aban sei utiliza 4-3-3 no bainhira jogu la’o ladi’ak sei iha mudansa. Agostinho informa, kondisaun jogadór Porto Taibessi di’ak hotu (laiha difikuldade).

Iha fatin hanesan, kapitaun Ultramar, Glaco Trajano konfesa katak, Ultramar sei hatudu jogu ne’ebé sériu no la konsidera Porto Taibessi ekipa fraku.

“Ami sei joga ho sériu. Ami la konsidera sira fraku maibé ami tenke serbisu maka’as nune’e aban bele manán jogu ne’e,” dehan Glaco.

Porto Taibessi aban hasoru Ultramar foin hala’o nia jogu ba dala uluk no Ultramar antes ne’e tebe sai ona Zebra iha jogu fulan hira liu-ba kotuk, ho nune’e aban ekipa refere kompleta nia jogu ba dala rua.

Entre ekipa rua sei hadau malu sé mak manán sei avansa ba oin hodi hasoru ekipa seluk tuir mai. Enkuantu, sé mak lakon, tenke sai tanba sistema jogu bota fora (sistem gugur-termu Indonézia).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here