Ministra Edukasaun Juventude no Desportu, Dulce de Jesus Soares. Imajen Tatoli/ Egas Cristóvão

DILI, 1 jullu 2019 (TATOLI)—Universidade Nacional Timor Lorosa’e (UNTL) hamutuk ho Universidade Victoria hosi Austrália organiza semináriu ida hodi aborda kona-ba kestaun Objetivu Dezenvolvimentu Sustentável (ODS).

Ministra Edukasaun Juventude no Desportu, Dulce de Jesus Soares ne’ebé loke semináriu ne’e hateten semináriu ne’e nu’udar semináriu anuál ne’ebé organiza hosi UNTL hamutuk ho Universidade Victoria Austrália hodi hare liliu kona-ba dezenvolvimentu iha Timor-Leste.

 “Tinan ida ne’e sira lori tópiku ida ne’ebé interesante tebe-tebes kona-ba Objetivu Dezenvolvimentu Sustentável ne’ebé maka ita Timor hola parte liliu edukasaun ne’ebé sai objetivu iha némeru kuartu hosi ODS,” dehan nia iha salaun CNE, Caicoli, Dili, segunda ( 1/7).

Nia konsidera katak semináriu ne’e importante tebes ba estudante sira atu hatene rasik progresu saida no dezafiu saida maka ODS iha no prosesu ODS ne’e rasik to’o iha ne’ebé ona ligadu liu-ba área edukasaun Timor-Leste nian nune’e saida maka bele atu kontribui.

Dulce hatutan kona-ba ODS, ekipa hosi Timor-Leste dadaun ne’e halo hela aprezentasaun iha Nova Iorke hodi haree ba progresu no dezafiu hosi ODS ne’e rasik. Nia esplika, ko’alia kona-ba ODS, iha pontu kuartu ne’ebé ko’alia liu iha setór edukasaun iha Timor-Leste intermu númeru infraestrutura tinan-tinan aumenta.

Nune’e mós, nia haktuir, área saúde nian hatudu progresu ne’ebé di’ak. “Ita iha eradika poliu depois malaria mós ita iha faze atu elemina ona. Iha área barak ne’ebé ita elimina ona. Hanesan mudansa klimátika, ita iha esforsu lubun ida maka ita halo atu bele kontribui ba eliminasaun mudansa klimátika ne’e,” tenik Dulce.

Iha fatin hanesan, fasilitadór ba temátiku iha semináriu ne’e, Ego Lemos hateten senináriu ne’e oinsá maka involve joven sira atu hatene lala’ok Objetivu Dezenvolvimentu Sustentável no nia implemetasaun iha Timor- Leste rasik.

Tuir nia haree, ODS ne’ebé maka sai ona planu prioridade governu nian, maski Timor- Leste seidauk atinje buat barak hosi ODS ne’e maibé hatudu ona liuhosi progresu balun ona. “Agora ita-nia tempu hela tinan sanulu resin ida atu atinje últimu alvu, maibé ha’u fiar katak hosi instituisaun ida-idak hala’o nia kna’ar oinsá maka bele atinje alvu sira ne’e,” dehan nia.

Nia hatutan semináriu ne’e aborda kona-ba temátiku lima importante no oradór sira aprezenta temátiku ne’ebé diferente. Nia rasik lori no aprezenta temátiku iha númeru I hosi ODS nian ne’ebé ko’alia liu kona-ba hamenus hamlaha no temátiku XVI nian hosi ODS ne’ebé maka ko’alia kona-ba moris iha rai leten.

Partisipa iha semináriu refere mai hosi estudante UNTL no univesitáriu hosi Universidade Victoria rasik, joven no péritu internasionál sira.

Jornalista: Jornalista Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here