Saudozu Samba 9. Imajen Mídia PR

LIQUIÇÁ, 1 jullu 2019 (TATOLI)—Saudozu Samba 9 hakotu iis hafoin monu no hetan kanek iha parte kanuruk iha domingu kalan (30/6) tuku 19:30 Otl. Hafoin monu, parte família kontatu kedas ambulánsia Liqiuiça nian, maibé to’o tarde, entaun família deside tula de’it ho karreta.

Oan Mane Saudozu Jaime Ribeiro alias Samba 9, Aniceto Ribeiro, haktuir saudozu Samba 9 la moras ida, maibé hafoin kalan no husu ba ferik ba li’ur (soe-bee ki’ik), derrepente monu.

 “Katuas monu purvolta tuku 19:30 hanesan ne’e. Nia monu ferik sai mai hiit nia, ninia iis ne’e ki’ik ona. Ami hein ambulánsia mós kle’ur, entaun primu balun lori hela karreta Estadu, entaun tuku 21:00 resin ami sai hosi Ulmera to’o iha Hospital Nacional Guido Valadares tuku 22:15 entaun labele salva ona katuas nia vida,’’ dehan oan mane-boot ne’e ho matan-been, iha Suku Ulmera, Postu Bazartete, Munisípiu Liquiçá, ohin.

Hafoin hakotu iis iha HNGV, Aniceto haktuir, laiha informasaun hosi médiku sira kona-ba saudozu Samba 9 nia mate. Maibé, nia dehan, Samba 9 ba halo ona tratamentu iha Singapura kona-ba matan nian, la’ós moras laran.

Nia hatutan, iha fulan maiu liu-ba nia laran ai fai saudozu nia ain entaun ain sai bubu, maibé moras seluk laiha.

“Hanesan oan mane sente triste tanba ami laiha ona aman ne’ebé atende ami-nia nesesidade. Só ha’u mak koko hanorin eskola Katólika iha Tibar, maibé ida ne’e bele sustenta sira na’in-7 ka lae. Sira na’in-7 sei ki’ik hotu,” nia haklaken ho triste.

Iha fatin hanesan, Veteranu António Pereira alias Oan Timor, rekoñese ambulánsia to’o tarde, maibé tula sai saudozu hosi Ulmera ho kondisaun krítiku tiha ona.

“Ami triste tanba funu-na’in ida husik derrepente hosi ita-nia leet, tanba la moras buat ida, maibé monu depois to’o hakotu nia vida,” dehan veteranu hosi Liquiçá ne’e.

Tuir observasaun hosi Agência Tatoli, kuaze veteranu funu-na’in tinan 24 sira marka prezensa iha mate uma, hanesan Komandante Aquito, Susar, Terra Mau Bulak, Tara, Alende, Majór Guido de Oliveira ho tan veteran sira seluk.

Marka prezensa mós Sekretáriu Estadu Veteranu, Gil da Costa ’Oan Soru’, Sekretáriu Estadu Protesaun Sivíl, Reprezentante hosi Ministériu Defeza, Ekipa Seguransa Sivíl, instituisaun hotu-hotu no autoridade hosi Munisípiu Liquiçá nian, família boot hosi Zona Remexio, hosi F-FDTL, PNTL, Gabinete Primeiru-Ministru, Xefe Estadu Maiór, Koronél Calisto dos Santos alias Coliati.

Jornalista: Evaristo Soares

Editór: Xisto Freitas

HAKEREK NO HATÁN

Please enter your comment!
Please enter your name here