Jurista timoroan, Manuel Tilman

DILI, 1 jullu 2019 (TATOLI)—Ekonomista Manuel Tilman husu ba ministériu kompetente no Parlamentu Nasionál atu kria lei ida hodi regula ema estranjeiru sira barak ne’ebé hala’o atividade negósiu ki’ik iha rai laran.

“Atu regula situasaun ida ne’e, parte kompetente no Parlamentu Nasionál sira bele tau lei ida fásil loos, katak tenke regula ema estranjeiru ne’ebé la’ós residente Timor-Leste,” dehan nia ba Agência Tatoli iha nia rezidénsia, Beach Garden Hotel, Praia dos Coqueiros, Dili, ohin.

Nia hatutan, ema estranjeiru tenke mai loke investimentu boot hodi fó serbisu barak ba ema timoroan sira, la’ós mai fali loke kioske, loke warung no seluk tan ne’ebé timoroan mós bele hala’o.

“Ho lei bele kontrola ona situasaun ida ne’e. Maibé se lei ne’e mak laiha, hanoin difísil tanba ita Timor-Leste adopta merkadu livre. Agora merkadu livre ne’e tenke iha kualifikasaun, kontrolu merkadu no kualidade produtu,” Tilman esplika.

Nia haktuir, Timor-Leste iha Lei Investimentu Nasionál no Internasionál ka regra, agora frakeza ida ema estranjeiru mai loke kioske ki’ik iha rai laran la’ós ho emprezáriu ida ho kualidade investimentu estranjeiru, maibé sira ne’ebé mai hanesan investedór estranjeiru depois rejistu tiha sira-nia kompaña iha Servisu Rejistu Verifikasaun Emprezariál (SERVE) no hetan rekoñesimentu seluk hanesan investimentu investedór estranjeiru hosi Trade Invest.

Jornalista: Nélson de Sousa

Editór: Xisto Freitas

HAKEREK NO HATÁN

Please enter your comment!
Please enter your name here