Komunidade sira simu vizita Prezidente Republika, Fransisco Guterres Lú Olo, ne'ebé akompaña husi nia espoza Cídalia Nobre Mouzinho Guterres ho dansa kultura Munisípiu Covalima. Imajen/Eugénio Pereira

COVALIMA, 1 jullu 2019 (TATATOLI)- Prezidente Repúblika, Francisco Guterres Lú-Olo, husu ba povu Suai, Munisípiu Covalima, atu labele fa’an rai arbiru ba ema estranjeiru.

Prezidente Repúblika misiona  lia hirak ne’e tanba nia  preokupa Suai oan balun komesa fa’an ona rai para atu hetan osan.

Prezidente Repúblika mós promulga ona Lei Rai iha loron 1 juñu 2017 ho artigu 85 hodi rezolve disputa rai ne’ebé akontese no fó títulu ba Timoroan atu sai na’in ba rai.

“Ha’u husu ba imi atu labele fa’an arbiru rai ba ema, tanba imi fa’an tiha rai imi ba goza osan ne’e hotu tiha imi la konsege hadi’a imi nia vida moris,” hateten PR Lú OLo ba populasaun Covalima bainhira halo diálogu aberta iha edifísiu Feto Santa Rosa Suai, Munisípiu Covamilia, sesta (28/6/2019).

Xefe Estadu mós husu ba VIII Governu Konstitusionál liuhusi Ministériu Justisa no Sekretáriu Estadu Terras no Prioridade atu bele haree prosesu implementasaun lei rai ne’e hodi fó sertifikadu rai ba timoroan sira ne’ebé rejista ona no la iha problema.

“Ha’u promulga ona lei rai ne’e, agora hein fali ba kompeténsia governu maka atu haree implementasaun ne’e oinsá,” hateten PR Lú Olo.

Parte seluk, Prezidente Câmara Comerçio  e Indústria Timor-Leste (CCI-TL), Ócar Lima, konsidera lei rai ne’e importante tebes ba setór privadu Timor-Leste bele hetan sertifikadu hodi uza halo kréditu ba banku sira atu bele hetan osan ba halo investimentu iha Timor-Leste.

Oscar Lima dehan, agora daudauk banku atu fó kréditu ba setór privadu presiza aprezenta mós sertifikadu rai hodi garantia ba banku bele fó osan.

Jornalista      : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here